Trafiku i paligjshëm i marijuanës tanimë ka shtrirë tentakulat e tij pothuaj në një pjesë të madhe të Spanjës, por edhe jo vetëm.

Në një fitore tjetër në luftën kundër drogës, forcat e zbatimit të ligjit në Spanjë kanë rrëzuar me mbështetjen e Europolit një organizatë ndërkombëtare të trafikut të drogës. Oficerët e policisë të armatosur rëndë mbërritën në një periferi të Barcelonës me pesë furgonë për të bastisur një shtëpi dykatëshe që kultivonte mbi 800 bimë marihuanë.

Bastisja e fundit, në të cilën Reuters shoqëroi oficerët është pjesë e një rutine pothuajse ditore të policisë në rajonin spanjoll të Katalonjës, pasi godet prodhimin e paligjshëm të marijuanës, që shpesh drejtohet nga bandat.

Me një numër vendesh kryesisht në Amerikë që legalizojnë ose rregullojnë përdorimin e marijuanës në vitet e fundit, Spanja është ligjërisht lejuese me konsumin personal. Por policia argumenton se krimi i organizuar që është rritur rreth biznesit të marijuanës, po e shndërron rajonin në një vend të rrezikshëm dhe duhet të trajtohet për të parandaluar bandat që të futen në këtë shtet.

“Rreziku është se këto organizata, gjëja e parë që duan është të bëjnë biznes. Ata thjesht kërkojnë paratë: “Unë dua të bëj para”. Më vonë për të siguruar këtë biznes, ata përpiqen të zgjasin tentakulat e tyre dhe mund të thuash, ata korruptojnë ose ndikojnë në lloje të tjera biznesesh, njerëz të tjerë që nuk janë brenda këtij rrjeti.”

Sipas Europol, por edhe autoriteteve spanjolle në përgjithësi trafikantët nuk synojnë kultivuesit ose përdoruesit e shkallës së vogël, të cilët frekuentojnë të ashtuquajturat klube ku konsumohet kanabisi, por rrjetet e mëdha të drogës, të cilat eksportojnë pjesën më të madhe të kanabisit jashtë vendit.

Disponueshmëria e shumë substancave të ndryshme të paligjshme mbetet gjithashtu shumë e lartë dhe problemi po bëhet më kompleks dhe i vështirë për t’u trajtuar.

Antoni Salleras, shefi i Njësisë së Krimit të Organizuar të Policisë Katalanase,  vë në dukje se të huajt, kryesisht nga vende të tjera në Evropë, Maroku dhe Amerika Latine, mbajnë numrin më të lartë gati 60%  të të arrestuarve vetëm vitin e kaluar.

“Kur është një biznes që gjeneron kaq shumë para, organizatat fokusohen të vijnë këtu për të bërë biznes. Shumë organizata vijnë nga jashtë shtetit spanjoll për t’u vendosur këtu, për të prodhuar dhe shitur marijuanë.”

Disa shërbime të pasurive të paluajtshme ose transportit tani funksionojnë pothuajse ekskluzivisht për prodhuesit, ndërsa ka një nivel të lartë dhune midis rrjeteve të drogës për të mbrojtur plantacionet, duke shkaktuar një rritje shqetësuese të posedimit të paligjshëm të armëve të zjarrit.

Vitin e kaluar, policia katalanase sekuestroi 26 ton bimë marijuanë, tre herë më shumë se në vitin 2021, dhe arrestoi 2,130 njerëz në atë që është shfaqur si një nga zonat kryesore të kultivimit të drogës në Evropë për shkak të ligjeve të saj të buta, klimës dhe faktorëve të tjerë.

Në operacionet kundër krimit të organizuar, sipas autoriteteve spanjolle, në të shumtën e rasteve droga e sekuestruar arrin vlera marramendëse gati edhe në rreth 156 milionë Euro në Katalonjë.

Një gram marihuanë kushton deri në gjashtë Euro, kjo peshë shitet diku tjetër në Evropë me dy deri në katër herë më shumë se çmimi.

“Shumica janë spanjollë, më shumë se 40% e të arrestuarve janë spanjollë. Ka kombësi të tjera, zakonisht vendet që kanë më shumë ndikim janë vendet që janë më afër nesh. Le të përmendim pak këtu edhe qytetarët me origjinë shqiptare të cilët kohët e fundit po marrin një rol gjithnjë e më të rëndësishëm sa i përket përdorimit të paligjshëm të drograve dhe më pas kultivimin e tyre. Franca, Italia, Anglia, Gjermania, Polonia mbajnë rekord. Gjithashtu jashtë Bashkimit Evropian, por shumë afër, si Maroku kemi parë një numër të lartë të të arrestuarëve të cilët për arsye sociale dhe ekonomike bëhen pjesë e botës së krimit. Në anën tjetër të Atlantikut shumë vende në rajonin e Amerikës së Jugut janë gjithashtu kampion në tregun e marijuanës.”

Konsumi i marihuanës dhe derivateve të saj po lulëzon edhe në vetë Barcelonën, duke përfshirë edhe klubet private. Barcelona kishte sasinë e tretë më të lartë të kanabisit në ujërat e saj të zeza në vitin 2022 midis dhjetëra qyteteve evropiane, pas Gjenevës dhe Amsterdamit, sipas një studimi nga agjencia e BE-së për drogën EMCDDA.

Kanabisi është droga më e konsumuar në Evropë dhe më e lidhur me shkeljet e ligjeve të drogës në të gjithë bllokun. Konfiskimet arritën nivelin më të lartë në një dekadë në vitin 2021, me Spanjën që përfaqësonte 66% të totalit.

Drejtori i EMCDDA, Alexis Goosdeel shpreht se kanabisi i rritur ilegalisht është rritur kryesisht në zona me një klimë të favorshme si Katalonja.

“Kjo është diçka që shqetëson të gjitha vendet anëtare të Bashkimit Evropian, sepse në vitin 2021 në Evropë ne kapëm 850 ton hashash që do të thotë se vinte kryesisht nga Maroku, por megjithatë ne sekuestruam 250 ton, pasi një pjesë e saj përfundoi në det e hedhur nga trafikantët. Pjesa më e madhe e kësaj droge prodhohej në territorin e BE-së, kështu që nuk është vetëm në Katalonjë. Pra, në shumë vende në Evropë ka probleme që lidhen me rritjen e kanabisit.”

Klubet private, ku blerja dhe pirja e marijuanës lejohet falë mungesës së rregulloreve kombëtare, janë rritur në numër në rreth 600 në Katalonjë, ose gati gjysma e  totalit të 1500 klubeve private të Spanjës. Por sipas ekspertëve, pronarët e tyre përballen me pasiguri më frikën se mund të mbyllen dhe të përfundojnë në prangat e policisë.

“Katër vende po përpiqen të zhvillojnë një politikë të BE-së që synon legalizimin e përdorimit rekreativ. Jo si model, por duke u përpjekur të kuptojnë se si mund të rregullojnë në nivel lokal, dhe mendoj se një shenjë mund të jetë se fakti i atyre vendeve, si Gjermania, Holanda, Malta dhe Luksemburgu, ata po mendojnë të lejojnë prodhimin për përdorim personal madje edhe në shtëpi. Tani kjo është ndryshe nga ajo që propozohet ose ajo që bëhet nga klubet e kanabisit.”

“Spanja është thjesht një vend shumë mendjehapur dhe shoqëria është e tilllë. Është ndryshe nga Franca pasi shumë gjëra janë të ndaluara, këtu çdo gjë përparon me shpejtësi.”

Katalonja dikur ishte një zonë tranziti për marijuanën derisa prodhimi filloi rreth tetë vjet më parë dhe është rritur që atëherë. Tani është rajoni më i lartë prodhues i Spanjës, me shumicën e eksporteve të kanalizuara në Francë.

Salleras shprehet se Katalonja është tërheqëse sepse prodhuesit mund të përdorin pronat e mbetura bosh, mund të vjedhin energjinë elektrike, për të cilën trafikantët nuk kryejnë një dënim me burg dhe krimet e lidhura me marihuanë mbartin dënime më të lehta sesa në vendet fqinje.

“Shoqatat e kanabisit nuk marrin furnizime nga këto organizata të mëdha të trafikut të drogës që ndoshta fitojnë shumë më shumë para duke e shitur atë në Bashkimin Evropian ose në vende të tjera por klubet e kanabisit marrin sasi të mëdha të tyre.”

Është e paligjshme prodhimi i marihuanës në Spanjë, por kultivimi i saj për përdorim personal ose pirja e duhanit nuk është i dënueshëm nëse të dyja ndodhin në një hapësirë ​​private sepse mbrohet nga të drejtat e privatësisë.

Blerja e farave tolerohet me premisën se është për qëllime grumbullimi, ndërsa klubet e kanabisit lejohen nga e drejta kushtetuese, megjithëse mbajtja dhe kultivimi i marihuanës është i paligjshëm.

“Dua të them që Barcelona në përgjithësi kanë patur numrin më të lartë të tokave ku mund të mbillej kanabisi. Këto u shfrytëzuan nga trafikantët. Ndoshta vetë autoritetet e kanë toleruar në Spanjë këtë gjë. Kemi parë shumë kompani që lulëzojnë këtu.”

Në vitin 2017, Katalonja legalizoi plotësisht klubet, duke nxitur përhapjen e tyre, por gjykatat më vonë e anuluan masën për arsye procedurale. Sipas rregullave të vetëimponuara, klubet duhet të kultivojnë marijuanën e tyre, të lejojnë vetëm të rriturit që mund të blejnë deri në 60 gram në muaj. Por shumë klube, të cilat shpesh mezi njihen nga jashtë, nuk u përmbahen rregullave.

“E keqja është se na ka munguar një rregullore shtetërore që lejon kontrollin mbi këto klube. Çfarë do të thotë kjo? Se brenda këtij modeli, tani për tani ka shumë njerëz që janë inkuadruar brenda. Pra, ne besojmë se mungesa e kontrollit të këtij sistemi është ajo që po krijon shumë probleme.”

Brenda ekstrakteve të mundshme të kanabisit që mund të gjenden në këto klube, sipas autoriteteve janë edhe disa barëra shumë të këqija të kanabisit. Farmakologia Mireia Ventura nga Energy Control, një shoqatë spanjolle që studion efektet e drogës dhe ofron informacion dhe vlerësim për përdoruesit mbi përdorimin e drogës, shprehet se tregu po ndikon shumë negativisht tek njerëzit.

“Kolofon është një nënekstrat më i shtrenjtë i kanabisit që mund të gjeni kudo. Vetëm një numër i vogël i përdoruesve e përdorin pasi është shumë e rrezikshme. Pra, jo të gjithë mund ta menaxhojnë përdorimin e kësaj substance.”

Pamjet ekskluzive të Reuters tregojnë procesin e prodhimit të kolofonit, i cili konsiston në vendosjen e dhjetëra barërave të këqija në një makinë që i lan ato me ujë dhe akull për t’i përzier dhe rrotulluar substancat. 

Përzierja më pas filtrohet për të marrë një rrëshirë të trashë të lëngshme, e cila zakonisht konsumohet. Panairi më i madh me temën e kanabisit në Evropë, “Spannabis”, i mbajtur në Barcelonë në mars të këtij viti , ilustroi lulëzimin e madh të këtij sektori, duke tërhequr vizitorë dhe kompani vendase dhe të huaja nga e gjithë bota.

Klan News