Islamabad - Ministri i Brendshëm i Pakistanit tha të premten se rreth 350 pakistanezë ishin në bordin e një anije peshkimi të mbipopulluar që transportonte emigrantë, e cila u mbyt jashtë Greqisë javën e kaluar dhe shumë mbeten të zhdukur e mund të kenë vdekur në një nga incidentet më vdekjeprurëse në detin Mesdhe.

Ministri i Brendshëm Rana Sanaullah Khan u tha ligjvënësve në Asamblenë Kombëtare se rreth 700 emigrantë ishin në varkë kur ajo u mbyt më 14 qershor. Vetëm 104 njerëz, përfshirë 12 pakistanezë, u shpëtuan dhe 82 trupa janë gjetur.

Numri i përgjithshëm i njerëzve në anije nuk është konfirmuar.

Khan tha se shumë nga pakistanezët e zhdukur dyshohet se kanë vdekur. “Deri më tani, 281 familje kanë kontaktuar me qeverinë duke thënë se djemtë ose të dashurit e tyre mund të kenë qenë mes atyre që ishin në varkë,” tha ai.

Komentet e Khan i tronditën ligjvënësit, të cilët u shfaqën të shqetësuar teksa fliste. Ishte hera e parë që një zyrtar i lartë ka raportuar se kaq shumë qytetarë pakistanezë janë zhdukur që nga fundosja e varkës. Zyrtarët aktualisht po mbledhin mostra të ADN-së nga njerëzit që thonë se të afërmit e tyre ishin në anije për të ndihmuar në identifikimin e trupave.

Qeveria ka nisur gjithashtu një goditje ndaj trafikantëve të qenieve njerëzore që organizuan udhëtimin për pakistanezët në varkën e peshkimit, shumë prej të cilëve kërkonin punë në Evropë. Deri më tani, policia ka arrestuar të paktën 17 trafikantë të dyshuar në lidhje me rastin.

Zyrtarët thonë se viktimat i kanë paguar kontrabandistët nga 5,000 deri në 8,000 dollarë për udhëtimin.

Greqia është kritikuar gjerësisht se nuk u përpoq të shpëtonte emigrantët para fundosjes në ujërat ndërkombëtare. Zyrtarët në Athinë thonë se pasagjerët refuzuan çdo ndihmë dhe këmbëngulën të vazhdonin për në Itali.

Nëntë egjiptianë të dyshuar për ekuipazhin e anijes janë në paraburgim në Greqi duke u përballur me akuza përfshirë pjesëmarrjen në një organizatë kriminale, vrasjen nga pakujdesia dhe shkaktimin e mbytjes së një anijeje.

Pakistanezët që besojnë se kanë humbur të afërmit në fundosje, po u bëjnë thirrje të tjerëve që të mos i dërgojnë të dashurit e tyre jashtë vendit ilegalisht. "Është më mirë të lini një drekë apo darkë pa ngrënë e të jetoni në Pakistan, në vend që të merrni rrezikun për të shkuar jashtë vendit me ndihmën e kontrabandistëve," tha Sawan Raza, i cili ka frikë se vëllai i tij, Ali Raza, është në mesin e personave të zhdukur.

Shumë nga emigrantët e zhdukur, duke përfshirë Raza, janë nga provinca më e populluar e vendit, Punjab si dhe qytetet e largëta në Kashmir, një rajon i diskutueshëm himalajan, i ndarë midis Pakistanit dhe Indisë.

Pakistani po përjeton një nga krizat e tij më të këqija ekonomike, me inflacion deri në 45% në muajt e fundit dhe shumë të rinj kanë bërë udhëtime të rrezikshme në Evropë për të gjetur punë më të mira.