Duke folur nga Brukseli, kreu i NATO-s, Jens Stoltenberg tha se ai priste më shumë premtime mbështetjeje nga aleatët e tij dhe investime më të mëdha në mbrojtje.

Sekretari i Përgjithshëm i NATO-s, Jens Stoltenberg tha se mbështetja që aleatët e NATO-s i kanë dhënë Ukrainës prej muajsh po sjell ndryshim në fushën e betejës. Ai foli të enjten  në fillim të konferencës dy-ditore të ministrave të mbrojtjes të NATO-s në Bruksel.

Stoltenberg i vlerësoi gjithashtu ushtarët ukrainas për trimërinë dhe aftësitë e tyre dhe tha se trupat mbrojtëse tashmë po arrinin fitore dhe po çlironin troje të pushtuara me kundërsulmin e shumëpritur.

Qëllimi i takimit të ministrave të mbrojtjes është që të diskutohen marrëdhëniet e ardhshme me Ukrainën pasi lufta e Rusisë kundër këtij vendi i pengon shpresat e saj për t'iu bashkuar së shpejti aleancës më të madhe të sigurisë në botë.

Ministrat po ashtu do të marrin pjesë në një takim të veçantë të Grupit të Kontaktit të Ukrainës së udhëhequr nga SHBA - një forum që mbështetësit e Ukrainës i bashkohen në mënyrë rutinore për t’u përpjekur të grumbullojnë armë dhe municione për të ndihmuar Kievin të luftojë kundër pushtuesve rusë.

Takimi i NATO-s vjen më pak se një muaj përpara se presidenti amerikan Joe Biden dhe homologët e tij të mblidhen për një samit në Lituani në një shfaqje simbolike të mbështetjes për Ukrainën. Ata pritet të nënvizojnë vendosmërinë e tyre për të vepruar nëse presidenti rus Vladimir Putin përpiqet të zgjerojë luftën drejt perëndimit.

NATO ra dakord në vitin 2008 që Ukraina do t'i bashkohej organizatës një ditë, por nuk caktoi një datë që ajo të fillonte bisedimet e anëtarësimit.

Ukraina aplikoi për "anëtarësim të përshpejtuar" në NATO më 30 shtator, ndërsa lufta vazhdonte. Me gadishullin e Krimesë të aneksuar dhe trupat ruse dhe separatistët pro-Moskë që mbajnë pjesë të jugut dhe lindjes, është e paqartë se si do të duken kufijtë e Ukrainës.

Sekretari i Përgjithshëm i NATO-s, Jens Stoltenberg, ka thënë se nuk ka konsensus për anëtarësimin e Ukrainës ndërkohë që është në luftë me Rusinë.