Sipas UNICEF, 640 milionë vajza dhe gra në mbarë botën janë martuar në fëmijëri, ose 12 milionë vajza në vit. Përqindja e vajzave të reja të martuara në fëmijëri është ulur nga 21% në 19% që nga vlerësimet e fundit të publikuara pesë vjet më parë.
Megjithatë, pavarësisht këtij progresi, reduktimi global do të duhet të jetë 20 herë më i shpejtë për të arritur Objektivin e Zhvillimit të Qëndrueshëm për t'i dhënë fund martesës së fëmijëve deri në vitin 2030.
Sipas analizës së re të UNICEF-it, pavarësisht rënies së vazhdueshme të martesave të fëmijëve në fillim të dekadës së kaluar, krizat e shumta, duke përfshirë konfliktin, goditjet klimatike dhe pasojat e COVID-19, kërcënojnë të zhbëjnë përfitimet e fituara me vështirësi.
Afrika Sub-Sahariane, e cila aktualisht ka shkallën e dytë më të lartë në botë të nuseve fëmijë (20%), është mbi 200 vjet larg përfundimit të praktikës me normën aktuale.
Rritja e shpejtë e popullsisë, e shoqëruar me krizat e vazhdueshme, duket se do të rrisë numrin e vajzave të reja të martuara në fëmijëri, në kontrast me rëniet e pritshme në pjesën tjetër të botës.
Amerika Latine dhe Karaibet po ashtu mbeten prapa dhe sigurisht që do të kenë nivelin e dytë më të lartë rajonal të martesës së fëmijëve deri në vitin 2030.
Pas periudhave të progresit të qëndrueshëm, gjithashtu në Lindjen e Mesme dhe Afrikën Veriore , Evropën Lindore dhe Azinë Qendrore, rënia ka ndaluar.
Azia Jugore, nga ana tjetër, vazhdon të udhëheqë reduktimet në nivel global dhe është në rrugën e duhur për të eliminuar praktikën e nuseve fëmijë në rreth 55 vjet.
© SYRI.net