Papa Françesku bëri shaka se është “ende gjallë” teksa doli nga spitali në Romë pas një qëndrimi tre-ditor.

Ai u shtrua në spitalin Gemelli në mesjavë me vështirësi në frymëmarrje dhe më vonë u diagnostikua me bronkit.

Vatikani kishte thënë se ai po i përgjigjej antibiotikëve dhe do të lirohej të shtunën, në varësi të rezultateve të testit.

"Unë nuk u frikësova, jam ende gjallë," u tha Papa 86-vjeçar gazetarëve dhe dashamirësve të përlotur jashtë spitalit përpara se të largohej.

Ai u pa duke buzëqeshur dhe duke përshëndetur nga makina, përpara se të dilte për të folur me një turmë. Më pas ai u nis për në Vatikan.

Pranimi i Papës në spital erdhi përpara javës më të ngarkuar në kalendarin e krishterë për të shënuar Pashkët.

Java e Shenjtë, siç dihet, përfshin një orar të ngjeshur ngjarjesh dhe shërbimesh që mund të jenë fizikisht kërkuese.

Zëdhënësi i Vatikanit Matteo Bruni tha të premten se Papa ishte i përjashtuar për të marrë pjesë në shërbimin e kësaj fundjave për të Dielën e Palmës.

“Mund të konfirmoj se, duke qenë se ai është planifikuar të largohet nga spitali nesër [të shtunën], Papa Françesku pritet të jetë i pranishëm në sheshin e Shën Pjetrit të dielën për kremtimin eukaristik të të Dielës së Palmave, Pasionit të Zotit”, tha Bruni në nje deklarate.

Ai shtoi se Papa do të kthehej në Santa Marta, rezidenca papale brenda Vatikanit, pasi të largohej nga spitali.

Papa argjentinas, i cili shënoi 10 vjet si kreu i Kishës Katolike në fillim të këtij muaji, ka vuajtur një sërë problemesh shëndetësore gjatë gjithë jetës së tij, duke përfshirë heqjen e njërës prej mushkërive në moshën 21-vjeçare.

Ai ka përdorur edhe një karrige me rrota muajt e fundit për shkak të problemeve që lidhen me gjurin e tij.

Por Papa ka mbetur aktiv, duke vizituar Republikën Demokratike të Kongos dhe Sudanin e Jugut në shkurt. Muajin e kaluar, ai drejtoi funeralin e paraardhësit të tij, Papa Benediktit XVI.