Parlamenti i Danimarkës u bëri thirrje politikanëve dhe personelit të fshijnë aplikacionin TikTok nga telefonat e tyre të punës si masë për sigurinë kibernetike, duke thënë se "ekziston një rrezik spiunazhi".

Aplikacioni popullor i shpërndarjes së videove, i cili është në pronësi të Kinës, përballet me një kontroll intensiv në Evropë dhe SHBA mbi sigurinë dhe privatësinë e të dhënave, mes shqetësimeve se TikTok mund të përdoret për të promovuar pikëpamjet pro-Pekinit ose për të mbledhur informacion nga përdoruesit.

Kryetari i parlamentit danez Søren Gade tha se një email u ishte dërguar të martën 179 anëtarëve të parlamentit dhe punonjësve me "një rekomandim të fortë që të fshijnë aplikacionin TikTok nëse e kanë instaluar më parë".

Parlamenti veproi pas një vlerësimi nga Qendra e Danimarkës për Sigurinë Kibernetike, e cila kishte thënë se ekzistonte rreziku i spiunazhit. Agjencia është pjesë e shërbimit të inteligjencës së jashtme të Danimarkës.