Danimarka do të zgjedhë një qeveri të re më 1 nëntor. Kryeministrja Mette Frederiksen e shpalli sot mbajtjen e  zgjedhjeve parlamentare.

Nga rezidenca e kryeministrit në Marienborg në veri të Kopenhagës, Frederiksen konfirmoi pritshmëritë e përhapura se zgjedhjet do të zhvillohen këtë vjeshtë.

“Danimarka është një vend fantastik. Por kohët janë të vështira”, tha ajo teksa dha njoftimin duke iu referuar krizës energjetike dhe luftës në Ukrainë ndërmjet sfidave të tjera dhe duke lënë të kuptohet se qeveria nuk e sheh këtë moment të mbajtjes së zgjedhjeve si ideal.

Ajo vazhdoi të përshkruajë politikat e platformës së qeverisë për zgjedhjet, përpara se të konfirmonte datën që do të mbahet votimi, 1 nëntor.

Qeveria do të kërkojë bashkëpunim me partitë e tjera në të gjithë qendrën politike, tha ajo.

Pritjet se zgjedhjet ishin të afërta u përforcuan të mërkurën në mëngjes kur partia Social Demokrate e Frederiksen nxori reklama të lidhura me zgjedhjet në gazetat daneze.