Rusia të premten pretendoi se trupat e saj kanë "çliruar plotësisht" fabrikën e çelikut Azovstal në Mariupol - streha e fundit e rezistencës ukrainase në qytetin jugor të pushtuar nga Rusia.

CNN nuk mund të verifikojë në mënyrë të pavarur që trupat ukrainase janë larguar nga fabrika e çelikut.

Ukraina nuk ka konfirmuar ende pretendimet e Rusisë, të cilat, nëse janë të vërteta, do të shënonin një fitore simbolike ushtarake për Moskën.

Rrethimi i Mariupolit: Qyteti port i rëndësishëm strategjik ishte një nga të parët që u vu nën sulmin rus pasi pushtimi i Moskës filloi më 24 shkurt. Në fillim të marsit, ai ishte rrethuar nga forcat ruse, duke i lënë banorët të përballeshin me mungesë të madhe ushqimi dhe uji — dhe bombardime të vazhdueshme qgoditën një maternitet dhe një teatër ku strehoheshin civilët.

Fabrika: Nga mesi i prillit, shumica e mbrojtësve të fundit ukrainas po luftonin për të mbajtur larg forcat ruse nga uzina e çelikut Azovstal - e cila ishte bërë gjithashtu një strehë për rreth 1,000 civilë, duke përfshirë disa të plagosur rëndë, të cilët ishin bllokuar pa kujdes mjekësor. 

Në fund të prillit, Rusia pretendoi se kishte arritur "çlirimin" e Mariupolit - të cilin presidenti ukrainas Volodymyr Zelensky e mohoi, duke thënë se ushtarët po rezistonin ende në qytet.

Përpjekjet për evakuim: Evakuimet e civilëve nga Azovstal filluan më 1 maj. Më 16 maj, ushtria e Ukrainës tha se forcat e saj kishin përfunduar "misionin e tyre luftarak" në fabrikën e çelikut, me qindra ushtarë të evakuuar nga objekti.

Qindra ushtarë ukrainas të evakuuar nga uzina u dërguan në një qendër paraburgimi, ndërsa të plagosurit rëndë po merrnin trajtim mjekësor, sipas Ministrisë ruse të Mbrojtjes.

Ukraina tha se pret të kryejë një shkëmbim të robërve rusë të luftës për ushtarët e plagosur rëndë.

Situata në terren: Nëse është e vërtetë, pretendimi i Rusisë të premten do të sugjeronte se i gjithë qyteti i Mariupolit ka rënë nën kontrollin rus pas gati tre muajsh luftime brutale.

Një zëdhënës nga Ministria ruse e Mbrojtjes pretendoi se "grupi i fundit prej 531 militantësh u dorëzua" në uzinë. Më parë, komandanti ukrainas i regjimentit Azov kishte lëshuar një urdhër që ushtarët të ruanin "jetën dhe shëndetin e tyre dhe të ndalonin mbrojtjen e qytet."

Videot e postuara në internet duket se tregojnë luftëtarët e mbetur të Azov që po largohen nga fabrika e çelikut. 

Përfitimet ruse: Nëse konfirmohet, rënia e fabrikës së çelikut Azovstal do të thotë se forcat ruse janë në kontroll të plotë të Mariupolit, duke u hapur rrugën atyre për të krijuar një korridor tokësor midis Rusisë dhe territorit të aneksuar të Krimesë.

Fitorja simbolike do të siguronte gjithashtu një port kyç në Detin Azov për Rusinë dhe do të lironte trupat ruse për të luftuar në vijën e parë të luftës në rajonin e Donbasit.