Thulasendrapuram, Indi - Një fshat i vogël, i gjelbëruar në Indi nga fusha me oriz, ndriçonte nga gëzimi të mërkurën, disa orë para se një pasaardhëse e tij, Kamala Harris, të bënte betimin si Zv.Presidentja e re e SHBA-së.

Harris do të shënojë histori si femra e parë, si gruaja e parë me ngjyrë, si personi i parë me origjinë  nga Azia jugore që mban këtë post të lartë.

Në vendlindjen e gjyshit të saj nga e ëma, në fshatin Thulasendrapuram, rreth 350 km larg nga qyteti bregdetar jugor Chennai, njerëzit ishin të lumtur dhe po përgatiteshin për të festuar.  "Ne jemi ndjerë shumë krenarë që një indiane po zgjidhet Zv.Presidente e Amerikës", tha mësuesja Anukampa Madhavasimhan. 

Gjyshi i Kamala Harris u zhvendos në Chennai, në kryeqytetin e shtetit Tamil Nadu disa dekada më parë. 

Nëna e ndjerë e Kamala Harris lindi gjithashtu në Indi para se të transferohej në SHBA për të studiuar në Universitetin e Kalifornisë.  Ajo u martua me një burrë xhamajkan dhe ata e quajtën vajzën e tyre Kamala, një fjalë sanskrite për “lulen e lotusit”. 

Përpara inaugurimit, lutje speciale për suksesin e saj u mbajtën në tempullin e qytetit, gjatë së cilës idhulli i hyjnisë hindu Ayyanar, një formë e Zotit Shiva, u la me qumësht dhe u stolis me lule nga prifti. 

Përpara zgjedhjeve të SHBA-së në nëntor, fshatarët në Thulasendrapuram gjithashtu u mblodhën me një ceremoni në tempull për t'i uruar Kamala Harris një fat të mirë. 

Pas fitores së saj, ata hodhën fishekzjarre dhe shpërndanë ëmbëlsira dhe lule si një bujari fetare. 

Posterat e Kamala Harris nga festimet e nëntorit ende zbukurojnë muret në fshat dhe shumë shpresojnë që ajo të ngjitet në krye të Presidencës në vitin 2024. 

Presidenti i zgjedhur Joe Biden i ka hedhur poshtë pyetjet nëse ai do të kërkojë të rizgjidhet apo do të dalë në pension. 

"Për katër vitet e ardhshme, nëse ajo mbështet Indinë, do të bëhet presidente," tha G Manikandan, i cili ka ndjekur Harris politikisht dhe dyqani i të cilit tregon me krenari një kalendar muri me fotografitë e Biden dhe Harris. Të martën, një organizatë që promovon vegjetarianizmin dërgoi pako ushqimore për fëmijët e fshatit si dhurata për të festuar suksesin e Harris.