Italia duket se po shkon drejt një izolimi të dytë për shkak të situatës nga pandemia, edhe pse deri më tani është mohuar një mbyllje që do i jepte goditje të rëndë ekonomisë së vendit që vuajti shumë gjatë valës së parë të koronavirusit.

Sipas “Corriere della Sera”, e cila i referohet burimeve qeveritare, Roma mund të shkojë në një bllokim të ri, nëse numri i pacientëve të shtruar në terapi intensive i tejkalon 2,300.

Vendimi për të rishikuar masat aktuale kufizuese erdhi të Mërkurën, pasi Italia regjistroi një rekord prej 15.199 infeksionesh të reja me Covid-19, brenda një dite. Kjo ishte shifra e saj më e lartë ditore në rastet e infektimeve që nga fillimi i pandemisë.

Edhe gazeta “la Repubblica”, shkruan për kërcënimin e një karantine të re nëse rastet ditore me të infektuar do të kalonin 20,000.

Kryeministri Giuseppe Conte e ka përjashtuar mundësinë e një izolimi të ri pas muajve të verës. Sidoqoftë, në javët e fundit, me rritjen e rasteve të reja të koronavirusit, kryeministri mund të ndryshojë mendje, shkruan The Guardian.

Të enjten, Conte i tha parlamentit se qeveria e tij ishte ‘ e gatshme për të ndërmarrë veprime të mëtejshme nëse ishte e nevojshme ‘.

Shqetësimi i Italisë është mungesa e shtretërve spitalorë, të cilët ishin pothuajse në kolaps gjatë valës së parë të pandemisë.

“Mbyllja e aktiviteteve “jo thelbësore” dhe ndalimi i lëvizjes midis rajoneve: këto janë masat që po studiohen nga qeveria nëse rregullat aktuale, nuk e frenojnë rritjen e kurbës epidemiologjike. Ekzekutivi zgjedh të ecë përpara “gradualisht” me një qëllim të deklaruar: të mbajë aktivitetet prodhuese dhe shkollat ??të hapura. Por nëse numri i rasteve të reja pozitive dhe mbi të gjitha ai i pacientëve të shtruar në spital vazhdon të rritet aq shpejt sa në ditët e fundit, duket qartë se duhet të kryhen edhe mbyllje të tjera progresive, pse jo edhe një izolim i ri”, shkruan Corriere della Serra.

Qendrat tregtare

Qendrat tregtare mbeten nën mbikëqyrje të veçantë në Itali. Disa guvernatorë tashmë kanë vendosur t’i mbajnë të mbyllura gjatë fundjavave, ku lëvizja e njerëzve është më e madhe. Nëse kurba epidemiologjike vazhdon të rritet, qeveria mund ta shtrijë këtë masë në të gjithë vendin. Duke lënë dyqanet ushqimore dhe farmacitë e hapura, ashtu siç ka bërë tashmë Lombardia. Një masë që për momentin konsiderohet si ekstreme dhe që po përpiqet të shmanget duke bindur Rajonet të ndërhyjnë aty ku numri i rasteve të reja dhe të shtruarve në spital vazhdon të rritet.