Komisioni që mbikëqyr debatet presidenciale në SHBA thotë se mund të ndryshojë formatin për të siguruar që përballjet e tjera mes Donald Trump dhe Joe Biden të jenë më të rregullta.
Sipas BBC, një masë do jetë shkëputja e mikrofonit nëse kandidatët tentojnë të ndërpresin njëri-tjetrin.
Ky lajmërim vjen pasi debati i së martës u katandis në sharje dhe fyerje mes rivalëve. Tonet e këtij debati janë kritikuar në mbarë botën.
Komisioni thotë se do të punojë dy ditët në vazhdim për të hartuar planin e masave dhe rregulloren për debatin e dytë. Në krye të listës është kontrolli mbi mikrofonin e debatuesve.
Të dy kampet do të informohen për rregullat e reja, por nuk do jenë subjekt negociatash, tha një burim.
Komisioni është një trupë e pavarur që organizon debatet presidenciale prej vitit 1988.
© SYRI.net