Presidenti amerikan, Donald Trump prezantoi atë që është quajtur edhe ‘Marrëveshja e Shekullit’. Bëhet fjalë për planin amerikan për Lindjen e Mesme. Ky plan ishte pritur prej shumë kohësh dhe u prezantua nga presidenti Trump në prani të kryeministrit izraelit, Benjamin Netanyahu.

Në një lëvizje surprizë, plani parashikon një Palestinë të pavarur. Zgjidhja ‘dy shtete’ është opsioni që shtron në tavolinë Amerika. Trump u bëri thirrje palestinezëve që të pranojnë planin, duke thënë se ai mund të jetë mundësia e fundit për ta. Deri më tani, palestinezët kanë rrëzuar çdo plan që ka rrjedhë në media.

“Palestinezët janë në varfëri dhe dhunë, të shfrytëzuar nga ata që kërkojnë t’i përdorin si masha për të avancuar ekstremizmin dhe terrorizmin. Ata meritojnë një jetë më të mirë,” tha Trump.

Ai tha se për herë të parë, Izraeli ka autorizuar edhe publikimin e një harte, e cila ilustron edhe kompromisin territorial.

Sipas Trump, harta e dyfishon territorin palestinez dhe ofron një kryeqytet për ta në Jerusalemin lindor, ‘ku Amerika do të ngrejë një ambasadë me krenari’. Jerusalemi do mbetet një qytet i pandarë,.

Por Bregu Perëndimor u mbetet izraelitëve dhe ai do të lidhet me Rripin e Gazës përmes një tuneli. Palestinezët e shohin Bregun Perëndimor si shumë të rëndësishëm për shtetin e tyre të ardhshëm. Asnjë palestinez nuk ishte gjatë prezantimit të planit.

Po ashtu asnjë demokrat nuk ishte aty. Plani është përgatitur nën kujdesin e dhëndrit të Trump, Jared Kushner.