Donald Trump lufton për kontrollin e lëvizjes Maga ndërkohë që email-et e Jeffrey Epstein-it thellojnë përçarjen

Nga James Politi - FT/

Donald Trump kishte pësuar tashmë një goditje të rëndësishme javën e shkuar, pasi humbjet e rënda të republikanëve në zgjedhjet jashtë ciklit treguan se votuesit po largoheshin nga politikat e tij dhe ai po haste vështirësi të mobilizonte bazën e tij.

Por të mërkurën, demokratët në Dhomën e Përfaqësuesve e çuan presidentin amerikan në një pikë të ulët të mandatit të tij të dytë, kur publikuan email-e nga i ndjeri Jeffrey Epstein, i dënuar për abuzim seksual me të mitur, që përfshinin mesazhe të dëmshme për të.

Goditja për Trump-in është sidomos e rëndë sepse rrezikon të thellojë një përçarje brenda lëvizjes së tij "Make America Great Again", e cila është zgjeruar javët e fundit, që nga përpjekjet e tij për të ulur inflacionin, deri te mbrojtja që ai i bën nevojës për punëtorë të huaj shumë të kualifikuar.

Mbështetja për presidentin ka ngecur në 43 për qind, ndërsa 54 për qind nuk e miratojnë, hendeku më i madh i mandatit të tij të dytë, sipas mesatares së sondazheve të Realclearpolitics.com. Deri të mërkurën pasdite, Trump po përpiqej të kufizonte dëmin brenda koalicionit të tij.

"Demokratët po përpiqen të nxjerrin sërish Mashtrimin Jeffrey Epstein sepse do të bëjnë gjithçka për të shpërqendruar vëmendjen nga mënyra e tmerrshme se si e kanë menaxhuar çështjen e mbylljes së qeverisë dhe shumë të tjera," shkroi ai në Truth Social, duke shtuar: "Vetëm një republikan shumë i keq ose budalla do të binte në atë grackë."

Të ashtuquajturat dosje Epstein, që përmbajnë informacion rreth hetimeve federale ndaj financierit të turpëruar, kanë qenë një temë e ndjeshme në të djathtën amerikane: ndërsa shumë nga mbështetësit e Trump-it pritën që administrata e tij e dytë të publikonte të gjitha dokumentet e lidhura me çështjen, kjo është bërë në mënyrë shumë të kufizuar.

Dokumentet fillestare të publikuara të mërkurën nga demokratët përmbanin email-e ku Epstein thoshte se Trump kishte "kaluar orë të tëra në shtëpinë time", "e dinte për vajzat" dhe ishte "qeni që nuk ka lehur", duke ngritur pyetje të reja mbi lidhjet e presidentit me Epstein-in.

Republikanët e Dhomës më vonë publikuan të gjithë paketën prej më shumë se 20 mijë dokumentesh që familja e Epstein-it ia dorëzoi Kongresit, pasi akuzuan demokratët se kishin "zgjedhur me tendencë" mesazhe të caktuara.

Trump ka thënë se ka qenë mik me Epstein-it për 15 vjet, por se janë konfliktuar më shumë se 20 vjet më parë. Ai ka mohuar çdo përfshirje në krimet e Epstein-it. Karoline Leavitt, sekretarja e shtypit e Shtëpisë së Bardhë, tha se dokumentet e publikuara të mërkurën ishin nxjerrë për të krijuar një "narrativë të rreme" rreth presidentit dhe për ta "njollosur" atë.

Por të mërkurën mbrëma, Mike Johnson, kryetari besnik i Dhomës së Përfaqësuesve, tha se do të mbante një votim javën e ardhshme për një rezolutë që kërkon publikimin e plotë të dosjeve Epstein. Adelita Grijalva, një përfaqësuese e re demokrate, u betua të mërkurën dhe pothuajse menjëherë nënshkroi një peticion që detyron një votim në sallën e Dhomës për këtë çështje.

Disa republikanë të afërt me presidentin, përfshirë Marjorie Taylor Greene, Lauren Boebert dhe Nancy Mace, kanë mbështetur gjithashtu masën.

"Pavarësisht përpjekjes së fundit të Presidentit për të bllokuar mocionin, dhe propagandës së @SpeakerJohnson, peticioni i shkarkimit që unë kam udhëhequr sapo pati sukses!" shkroi në X Thomas Massie, kongresist republikan nga Kentucky, të mërkurën pasdite.

Përplasja e re rreth Epstein-it po ndodh ndërsa Trump përballet me presion të pazakontë nga e djathta, ku po rritet pakënaqësia për faktin se ai po fokusohet më shumë te politika e jashtme sesa te një përpjekje e pandalshme për të trajtuar problemet e kostos së jetesës që çuan në fitoren e tij në vitin 2024. Disa nga mbështetësit e Trump-it mbetën edhe më të habitur nga vendimi i tij për të pritur këtë javë në Shtëpinë e Bardhë presidentin sirian Ahmed al-Sharaa, një ish-militant të al-Qaeda-s.

Në planin e brendshëm, kritikët republikanë u kapën me deklarimet e fundit të Trump-it, ku ai mbronte nevojën që universitetet të pranojnë studentë të huaj për të mbajtur financat dhe që kompanitë të përdorin vizat H1B për punëtorë shumë të kualifikuar, gjë që shumë populistë të djathtë e kundërshtojnë.

"A e përmenda që Trump nuk është i përsosur?" tha Steve Bannon, ish-strategu i tij politik, në podkastin e tij War Room të mërkurën. "Ai është një instrument jo i përsosur, por i frymëzuar nga providenca hyjnore. Po të mos e kishit atë… nuk do të kishit asgjë."

Por një valë dyshimesh e drejtuar nga republikanët ndaj Trump-it po rritet. Një plan i propozuar nga presidenti për të mbështetur kredi 50-vjeçare u kritikua gjerësisht nga e djathta.

"Ti thjesht po faturon më shumë dhe po e zgjat në kohë. Është si të zgjidhësh urinë jo duke dhënë ushqim, por duke u dhënë njerëzve pipa më të gjatë," tha Glenn Beck, drejtues konservator i medias. "Kjo nuk është liri, është grackë… është qira e maskuar si pronësi shtëpie."

Greene, e cila ka nënshkruar peticionin për dosjet Epstein, peticion i kundërshtuar nga Trump në Dhomë, publikoi një kritikë të fortë në X të mërkurën kundër disa politikave të administratës, duke thënë se ajo është kundër që amerikanët "të zëvendësohen nga punëtorë të huaj, si me H1B", dhe "kundër lejimit të studentëve të huaj në kolegjet dhe universitetet tona".

"Unë jam 'America First' dhe 'America Only'. Ky është rrugëtimi im dhe nuk ka tjetër."

Trump është ndier i goditur nga këto sulme të brendshme. Këtë javë, ai tha se kongresistja nga Georgia "ka humbur rrugën", dhe gjatë një interviste jashtëzakonisht konfrontuese me Fox News, ai u përpoq të rimerrte flamurin e tij të populizmit, pikërisht në një moment kur ai po vihet në dyshim.

"Mos harroni se Maga ishte ideja ime. Maga nuk ishte ideja e askujt tjetër. Unë e di më mirë se kushdo tjetër se çfarë dëshiron Maga," tha ai. / Financial Times - Syri.net