Për presidentin amerikan, spekulimi për diçka që duket e pamundur ka një qëllim strategjik

Nga Rob Crilly - The Telegraph/

Shumë kohë para se Donald Trump-i të vendoste të kandidonte për president, ai kishte kuptuar se ia vlente të flisje për mundësinë e një kandidimi për president.

Ishte viti 1988 kur manjati i pasurive të paluajtshme i tha Oprah Winfrey-t se ndoshta nuk do të garonte për Shtëpinë e Bardhë, por, nga ana tjetër, nuk e përjashtonte as këtë mundësi.

"Jam vërtet i lodhur duke parë çfarë po ndodh me këtë vend, sesi po i bëjmë të tjerët të jetojnë si mbretër, ndërsa ne jo," i tha ai.

Vite përpara se emisioni i tij televiziv The Apprentice t'i sillte një audiencë prej miliona njerëzish dhe shumë para se të merrte punonjësin e tij të parë politik në vitin 2011, ajo deklaratë e bëri të njohur në gjithë vendin në një mënyrë që jeta e tij si playboy dhe zhvillues pasurish në Nju Jork nuk e kishte arritur kurrë.

Kthehemi pas 37 vjetësh, në avionin presidencial Air Force One, gjatë fluturimit për në Tokio të hënën, ndalesa e dytë e turit të tij në Azi, dhe ai ende e kupton fuqinë e idesë.

"Do ta doja shumë. Kam numrat më të mirë që kam pasur ndonjëherë," u tha ai gazetarëve, kur e pyetën për mundësinë e kandidimit për një mandat të tretë.

Vetëm një problem: Amendamenti i 22-të i Kushtetutës e përcakton qartë se presidentët janë të kufizuar në vetëm dy mandate.

Pra, pse vazhdon të flasë për këtë?

Siç e di edhe vetë Trump, titujt e lajmeve nuk janë të detyruar nga Kushtetuta të injorojnë spekulime të tilla. Rezultati këtë javë ishte një valë e re artikujsh për atë nëse presidenti ishte gati të thyente sërish norma, rregulla dhe ligje.

Siç kur foli me Oprah-un, të flasësh për një kandidim është mirë për profilin publik (sikur ka nevojë për këtë).

Thuhet se ai u ka thënë njerëzve të afërt se është një nga shumë taktikat e tij për të marrë vëmendje dhe për të irrituar demokratët.

Kjo gjithashtu përshtatet me imazhin e tij si një president që sfidon normat, një njeri që mund të bombardojë anije në ujërat e Karaibeve apo të shembë krahun lindor të Shtëpisë së Bardhë pa pyetur askënd.

Dhe për një president që e di se i kanë mbetur vetëm rreth tre vjet në detyrë, kjo taktikë e mban larg momentin e pashmangshëm të fundit të mandatit dhe partia e tij do të ndalojë së e dëgjuari.

Pasi e ka hedhur këtë ide në qarkullim, ai mund të mbështetet tek gazetarët që të kapin karremin.

Kapelat "Trump 2028" janë bërë një gjë e zakonshme. Demokratët që vizitojnë Zyrën Ovale i gjejnë ato mbi tavolinën Resolute.

Javën e kaluar, Steve Bannon, i cili ishte për pak kohë strategu kryesor gjatë mandatit të parë të Trump-it, pretendoi se tashmë ekziston një plan për një përpjekje për mandat të tretë, megjithëse nuk dha detaje.

Të gjitha këto i bëjnë republikanët ambiciozë të ndalen për një moment. Ata nuk mund të nisin përgatitjet e tyre për vitin 2028 nëse Trump ka qoftë edhe një grimcë interesi për të kandiduar sërish. Kështu ai mbetet forca lëvizëse e partisë deri në vitin 2029.

Kjo e lë atë në rolin e "kingmaker"-it. Teksa ngacmon idenë e një kandidimi, ai gjithashtu përmend dy kandidatë të mundshëm.

"Kemi njerëz të shkëlqyer, nuk kam pse të hyj në detaje. Por njëri prej tyre është këtu," tha ai, duke iu referuar Sekretarit të Shtetit Marco Rubio, që e shoqëronte në kabinën e shtypit të Air Force One, para se të përmendte zëvendëspresidentin JD Vance.

Rubio qeshi dhe uli kokën me mendimin e atij skenari.

Për momentin, ideja e një mandati të tretë mbetet e gjallë. Dhe ky spekulim i shërben një qëllimi tjetër.

Trump mund të mos e shtyjë fort këtë ide, por as nuk e përgënjeshtron. Po sikur populli amerikan të kërkojë që ai të shërbejë një mandat tjetër duke filluar nga viti 2029? Çfarë mund të bëjë Trump, përveçse t'i përgjigjet kërkesës së mbështetësve të tij si një shërbëtor i përulur i popullit?

"A nuk po e përjashtoj mundësinë? Këtë duhet ta më thoni ju," tha ai në Air Force One.

Në botën e Trump-it, diçka mund të fillojë si një shaka apo si një mënyrë për të tallur liberalët, por kjo nuk do të thotë se nuk është e vërtetë. / The Telegraph - Syri.bet