A është kjo 12-vjeçarja më e rrezikshme në botë?

Zëvendësim organesh, 150 vjet jetëgjatësi dhe ndoshta edhe pavdekësi: Vladimir Putin, Xi Jinping dhe Kim Jong-un mund të jenë duke planifikuar të qëndrojnë në pushtet përgjithmonë, të paktën nëse i besojmë bisedës së tyre të fundit në Pekin.

Megjithatë, Kim duket se ka edhe një plan rezervë: një vajzë e vogël me kostum të zi elegant.

Kim Ju-ae, e cila doli nga një tren i blinduar pas babait të saj kur ai mbërriti në kryeqytetin kinez, dhe qëndroi në krah të tij gjatë pjesës më të madhe të vizitës, është fëmija i vetëm i pranuar publikisht i udhëheqësit të Koresë së Veriut. Mendohet të jetë 12 ose 13 vjeçe dhe, sipas agjencisë së inteligjencës së Koresë së Jugut, trashëgimtarja më e mundshme e të atit.

Duke e prezantuar atë para Xi-së (aleatit më të rëndësishëm të Phenianit), Putinit dhe botës, sikur të ishte zëvendësja e tij, Kim dërgoi një mesazh të qartë: "Dinastia Kim nuk ka ndër mend të zhduket," thotë Edward Howell, pedagog i marrëdhënieve ndërkombëtare në Universitetin e Oksfordit.

Në një vend ku paraqitjet e udhëheqësve janë të orkestruara deri në detaj, një mesazh i tillë nuk mund të ketë qenë i rastësishëm. Për më tepër, nëse Kim Ju-ae po përgatitet me të vërtetë si udhëheqësja e ardhshme e mbretërisë së izoluar që posedon armë bërthamore, atëherë ajo do të ishte vajza më e fuqishme dhe më e rrezikshme në botë. Por kush është ajo? Dhe si ka mundur dikush kaq i vogël të bëhet një diktatore e ardhshme?

Kim Ju-ae u shfaq për herë të parë publikisht në nëntor 2022, gjatë testimit të raketës më të madhe balistike të vendit.

Ajo kishte veshur pantallona të zeza dhe një xhup të bardhë me mëngë shumë të gjata për krahët e saj. Duke ecur dorë për dore me babanë në pistën e lëshimit, dukej e gjatë për moshën që kishte, por mbetej qartazi një fëmijë.

Në muajt që pasuan, Kim e mori me vete në një sërë aktivitetesh të tjera ushtarake. Më pas, edhe në aktivitete ekonomike, shoqërore, kulturore dhe takime të ndryshme.

Ndërsa ndryshonin aktivitetet, ndryshonin edhe veshjet e saj. Deri në nëntor 2023, ajo u fotografua pranë babait dhe zyrtarëve të lartë ushtarakë me një pallto lëkure të gjatë me jakë leshi dhe doreza, më shumë si një antagoniste filmash të Bondit sesa një paraadoleshente. Pasuan ngjarje të tjera, përfshirë ndeshje futbolli dhe takime me shkencëtarë satelitorë, me një pamje gjithnjë e më formale dhe të rritur.

Më pas, në maj të këtij viti, ajo bëri debutimin e saj diplomatik, duke shoqëruar të atin në ambasadën ruse në Phenian për të shënuar Ditën e Fitores së Rusisë. Në retrospektivë, kjo shënoi daljen e saj në skenën ndërkombëtare.

"Në këtë kuptim, mund të thuhet se shenjat ishin aty. Nuk duhej të ishte tronditëse ta shihje Kim Ju-ae në Pekin me të atin," thotë Rachel Minyoung Lee, këshilltare e lartë në 38 North, një institut studimor me bazë në Uashington që fokusohet te Koreja.

"Por ishte befasuese që ajo shkoi në Kinë, sepse ky është një nivel tjetër. Nuk është thjesht një paraqitje diplomatike. Nëse shohim historinë, Kim Jong-il [babai i Kim Jong-un] shkoi në Kinë pasi u shpall trashëgimtar."

Mediat e Koresë së Veriut kanë filluar gjithashtu ta quajnë atë "fëmija i respektuar". Lee vëren se ky "nuk është një term që përdoret për këdo. Është i rezervuar. Zakonisht ruhet për udhëheqjen."

Vëzhguesit e jashtëm nuk e kanë lënë pa vëmendje. Këtë javë, The New York Times citoi një ekspert që e njeh Korenë e Veriut, i cili tha se gjatë vizitës në Kinë, Kim kishte dërguar një "sinjal të fortë për botën" se Kim Ju-ae do të ishte trashëgimtarja e tij.

Skenat në Pekin "treguan se ajo po trajtohej si numri 2 i Koresë së Veriut, jo vetëm brenda vendit por edhe jashtë tij", tha Cheong Seong-chang, nga Instituti Sejong me bazë në Seul.

Megjithatë, pavarësisht zhvillimeve të fundit, Lee mbetet e kujdesshme. Gabimi më i zakonshëm në analizimin e Koresë së Veriut, paralajmëron ajo, është tejinterpretimi i fragmenteve të inteligjencës së dukshme intriguese pa i vendosur në kontekstin e duhur.

Është e vërtetë se vendi nuk ka parë kurrë më parë një vajzë të dinastisë Kim (që ka sunduar Korenë e Veriut që nga viti 1948 dhe pretendon të vijë nga një gjak i shenjtë) të paraqitet publikisht, dhe as që mediat e tij të prezantojnë një anëtar të familjes kaq të ri.

Por shfaqja e Kim Ju-ae si trashëgimtare e dukshme nuk garanton se ajo do të ulet realisht në fronin e Udhëheqësit Suprem.

Ajo nuk është e vetmja kandidate. Halla e saj, Kim Yo-jong, konsiderohet gjerësisht si personi i dytë më i fuqishëm në Korenë e Veriut dhe ishte gjithashtu në Pekin, ku u fotografua me Xi-në dhe Putinin. Deri në daljen publike të Kim Ju-ae, ajo shihej si trashëgimtarja më e mundshme e Kim Jong-un.

Për më tepër, pasiguria shtohet nga fakti se nuk ka një model të përcaktuar trashëgimie në Korenë e Veriut.

Kim Jong-il u përgatit për trashëgiminë për 14 vjet para se Kim Il-sung, themeluesi i Koresë së Veriut, të vdiste në vitin 1994. Por Kim Jong-un u shfaq si pasardhës vetëm rreth një muaj para se babai i tij të vdiste në vitin 2011, duke anashkaluar djemtë e parë dhe të dytë të diktatorit të atëhershëm. Për rrjedhojë, ai u detyrua të ashpërsonte pushtetin e tij në mënyrë brutale, duke përfshirë edhe urdhrin e dyshuar për vrasjen e njërit prej vëllezërve më të mëdhenj me agjent nervor.

"Nëse kjo është një fushatë trashëgimie, lindin pyetje të tilla si: 'A ka probleme shëndetësore Kim Jong-un, apo thjesht dëshiron të marrë 20 vjet kohë për ta përgatitur të bijën si pasardhëse dhe për t'ia bërë më të lehtë publikut idenë e një udhëheqëseje femër?'" thotë Lee. "Nëse nuk është fushatë trashëgimie, atëherë çfarë përpiqet të përfitojë duke e ekspozuar vajzën e tij në këtë mënyrë?"

Sipas Howell, ka dy përgjigje për këtë pyetje të dytë. "Së pari, ai dëshiron të bëjë shumë të qartë, si për publikun e brendshëm koreanoverior, ashtu edhe për audiencat e huaja, se dinastia Kim nuk ka ndër mend të zhduket, pavarësisht nëse pasardhësja është vajza, motra apo një prej fëmijëve të tjerë të tij," thotë ai.

"Së dyti, mendoj se Kim Jong-un do të tregojë se, pavarësisht të gjitha thashethemeve për shëndetin e tij, dhe ne e dimë që nuk është në gjendje të mirë shëndetësore, dimë që ka pasur probleme gjatë periudhës së Covid-it, ai është këtu për të qëndruar."

Në moshën 41 ose 42 vjeç, Kimi i madh duhet të ketë ende disa dekada përpara, nëse arrin të kontrollojë peshën dhe vesin e tij të duhanpirjes. Dhe duke pasur parasysh moshën e saj të njomë, Kim Ju-ae ka shumë pak gjasa të trashëgojë pushtetin nëse i ati do të ndërronte jetë papritur nesër.

Theksimi i rolit të tij si baba, dhe rrjedhimisht si "baba i kombit", është gjithashtu propagandë e dobishme, thotë Howell. Mund të jetë gjithashtu një përpjekje për të zbutur imazhin e regjimit, për të krijuar idenë se ka një anë njerëzore përtej obsesionit me fuqinë ushtarake.

Me shumë gjasë, thotë Lee, dalja e parë publike e Kim Ju-ae në testin e raketës para tre vjetësh ishte një mënyrë për të justifikuar para koreanoveriorëve shpenzimet e mëdha për armatime: mesazhi ishte ky, kjo bëhet për të mbrojtur fëmijët tanë; po e bëjmë për gjeneratën e ardhshme.

Pastaj është edhe çështja e gjinisë. Koreja e Veriut mbetet një shoqëri patriarkale dhe konservatore në aspektin shoqëror.

Megjithatë, një udhëheqëse supreme femër nuk është e pamundur. Ngritja e Kim Yo-jong e ka bërë tashmë të imagjinueshme, të paktën për vëzhguesit e jashtëm. Dhe, në vitin 2022, Kim emëroi Choe Son-hui, një diplomate karriere nga një familje elitare, si gruan e parë ministre të jashtme të vendit. Vitin e kaluar, ajo u ngrit në Byro Politike, organi vendimmarrës i partisë në pushtet, duke u bërë e vetmja grua anëtare.

Megjithatë, këto dy raste mbeten përjashtime të dukshme. Dhe parashikimi i karrierave është i vështirë, sepse të vëzhgosh Korenë e Veriut nuk ngjan me asnjë formë tjetër raportimi për ndonjë vend tjetër.

Në kontrast me Kinën, Rusinë apo Iranin, gazetarët dhe akademikët nuk mund të telefonojnë ose të pinë çaj me ish-zyrtarë, akademikë apo deputetë për të kuptuar mendësinë e regjimit. Nuk ka konferenca shtypi, nuk ka intervista, nuk ka informacione "off the record". Dhe nuk ka as testim joformal të opinionit publik duke u përzier thjesht me njerëzit në Phenian.

Kjo shpesh i lë ekspertët të kërkojnë shenja nga media e kontrolluar fort e Koresë së Veriut, dhe të kthehen pas në histori për precedentë e kontekst me të cilët të shpjegojnë zhvillimet e tanishme.

Për fat të keq, Kim Jong-un ka treguar një vendosmëri për të vepruar ndryshe nga Kim Il-sung dhe Kim Jong-il.

Ai i ka zëvendësuar të dy pararendësit me kultin e tij personal të individit, dhe mbi të gjitha, thotë Howell, vitin e kaluar braktisi synimin për ribashkimin e gadishullit korean nën kontrollin e Veriut, një objektiv thelbësor i të atit dhe gjyshit të tij (pushtimi në rast lufte, siç ka bërë të qartë, mbetet ende një mundësi shumë reale).

Me Kim Ju-ae, ai ka krijuar një mister të ri për vëzhguesit e huaj. Shumë do të shkruhet për të në vitet që vijnë. Por jo gjithçka duhet besuar.

Siç shpjegon Lee: "Të jesh analist i Koresë së Veriut mund të jetë gjëja më e vështirë, por edhe më e lehtë, sepse askush nuk do të të kundërshtojë." / The Telegraph - Syri.net