Amazon po përgatit një rikthim në tregun e smartfonëve, më shumë se 10 vjet pas dështimit të Fire Phone, sipas Reuters.

Në vitin 2014, kompania lançoi Fire Phone, duke shpresuar të konkurronte me Apple dhe Samsung. Sidoqoftë, telefoni nën mbikëqyrjen e themeluesit Jeff Bezos u tërhoq pas vetëm një viti dhe mbetet një nga dështimet më të mëdha të Amazon.

Sipas katër burimeve të Reuters, kompania po zhvillon aktualisht një telefon të ri, i njohur brenda kompanisë si “Transformer”, brenda njësisë së pajisjeve dhe shërbimeve. Ky telefon pritet të jetë një pajisje mobile për personalizim që mund të sinkronizohet me asistentin zanor Alexa dhe të shërbejë si një urë lidhëse për klientët e Amazon gjatë gjithë ditës.

Projekti synon të realizojë vizionin afatgjatë të Bezos për një asistent universal të bazuar në zë, i ngjashëm me kompjuterët e komanduar me zë të serialit shkencor “Star Trek”. Telefoni do të integronte aftësitë e inteligjencës artificiale për të lehtësuar përdorimin e shërbimeve të Amazon, përfshirë blerjet online, Prime Video, Prime Music dhe shërbime të tjera të partnerëve si Grubhub.

Burimet nënvizuan se Alexa do të jetë një komponent kyç, por jo sistemi kryesor operativ i telefonit. Telefoni mund të eliminojë nevojën për dyqanet tradicionale të aplikacioneve, duke ofruar një përvojë të personalizuar pa kërkuar shkarkimin ose regjistrimin për aplikacione.

Dështimi i Fire Phone

Fire Phone u lançua me një vit falas të Amazon Prime, por shitjet mbetën të ulëta.

Pas uljes së çmimit nga 649 dollarë në 159 dollarë, telefoni u tërhoq pas 14 muajsh, duke shkaktuar një humbje prej 170 milionë dollarësh për inventarin e pa-shitur.

Analisti Colin Sebastian nga R.W. Baird theksoi se, megjithëse sfidat janë të mëdha, dështimi i mëparshëm nuk e bën të pamundur për Amazon të përpiqet përsëri. Ai shtoi se konsumatorët janë të lidhur me dyqanet ekzistuese të aplikacioneve, çka do ta bëjë sfidën të ndërlikuar.

Sfida dhe mundësitë

Transformer është pjesë e një iniciative më të madhe të njësisë ZeroOne të Amazon, e krijuar për të zhvilluar pajisje inovative.

Projekti mund të përfshijë një smartphone tradicional ose një “dumbphone” minimalist, i frymëzuar nga telefoni Light Phone, që mund të shërbejë si pajisje dytësore pranë iPhone-ve dhe Samsung Galaxy-ve që përdoruesit tashmë kanë.

Sakaq, data e lancimit, çmimi dhe angazhimi financiar i Amazon për Transformer mbeten të paqarta, dhe projekti mund të ndërpritet nëse strategjia ndryshon ose për shkak të shqetësimeve financiare.