Instagram do t’i paralajmërojë prindërit nëse fëmijët e tyre kërkojnë përmbajtje që lidhet me vetëvrasjen

Rrjeti social Instagram, në pronësi të Metës, së shpejti do të fillojë t’i paralajmërojë prindërit nëse fëmijët e tyre adoleshentë e përdorin aplikacionin për të kërkuar përmbajtje që lidhet me vetëvrasjen ose vetëlëndimin, raportuan sot mediat amerikane.

Ky veprim është pjesë e përpjekjeve të fundit të kompanisë për të përmirësuar veçoritë e saj të sigurisë, ndërsa përballet me një debat rreth asaj se si mediat sociale ndikojnë tek të rinjtë, raporton CBS News.Meta njoftoi se, duke filluar nga java e ardhshme, prindërit që përdorin mjetin e monitorimit të Instagram-it do të marrin mesazhe, me anë të email-it, SMS-ve ose WhatsApp-it, në lidhje me nëse fëmija i tyre ka kërkuar vazhdimisht për përmbajtje dhe fraza të caktuara që lidhen me vetëvrasjen ose vetëlëndimin gjatë një periudhe të shkurtër kohore.

Siç deklaroi kompania, mesazhi do t'i informojë gjithashtu prindërit se si t'i qasen bisedave të ndjeshme rreth shëndetit mendor.

“Shumica dërrmuese e adoleshentëve nuk përpiqen të kërkojnë përmbajtje vetëvrasëse dhe vetëlëndimi në Instagram, dhe kur e bëjnë këtë, politika jonë është t’i bllokojmë këto kërkime dhe në vend të kësaj t’i drejtojmë ata drejt burimeve dhe linjave të ndihmës që mund të ofrojnë mbështetje”, tha kompania.

Masa e re mbrojtëse fillimisht do të zbatohet në Shtetet e Bashkuara, Mbretërinë e Bashkuar, Australi dhe Kanada përpara se të shtrihet në rajone të tjera më vonë këtë vit.

Në tetor të vitit të kaluar, Meta prezantoi gjithashtu kufizime për përmbajtjen bazuar në moshë që bllokojnë përdoruesit nën 18 vjeç nga shikimi i rezultateve të kërkimit për terma të caktuar, të tilla si "alkool" ose "i etur për gjak".

Kompania tha në atë kohë se i kishte mbrojtur tashmë adoleshentët nga rezultatet e kërkimit që lidheshin me vetëvrasjen, vetëlëndimin dhe çrregullimet e të ngrënit.

Masat e reja të sigurisë vijnë ndërsa një gjyq që po zhvillohet në Los Angeles mbi faktin nëse platformat, përfshirë YouTube në pronësi të Alphabet, janë projektuar qëllimisht për të krijuar varësi tek përdoruesit e rinj.

CEO i Meta-s, Mark Zuckerberg, u përball me pyetje në gjykatë javën e kaluar në lidhje me përdoruesit e rinj të Instagram-it dhe përpjekjet e Meta-s për t'i mbrojtur ata më tej.

Instagram specifikon që përdoruesit duhet të jenë të paktën 13 vjeç për t'u regjistruar në këtë aplikacion.

Në gjyq, Zuckerberg pranoi, megjithatë, se ky rregull është i vështirë për t’u zbatuar, sepse përdoruesit ndonjëherë gënjejnë për moshën e tyre.

Për të verifikuar moshën e një përdoruesi, Instagram i kërkon atij të japë detaje të tilla si data e lindjes, një foto dhe një video.