Indonezia ka bllokuar përkohësisht chatbot-in Grok, të zhvilluar nga kompania e Elon Musk, xAI, për shkak të rrezikut nga përmbajtja pornografike e gjeneruar nga inteligjenca artificiale. Ky vendim e bën Indonezinë shtetin e parë që ndalon aksesin në këtë mjet.

Qeveria indoneziane deklaroi se përdorimi i “deepfake” seksual pa pëlqimin e personave është një shkelje serioze e të drejtave të njeriut dhe sigurisë digjitale. Ministria e Komunikimit ka thirrur përfaqësues të xAI për të diskutuar çështjen.

Më parë, kompania kishte çaktivizuar funksionin e krijimit të imazheve për shumicën e përdoruesve pas kritikave për përdorimin e tij për përmbajtje seksualizuese dhe të dhunshme, përfshirë manipulimin e imazheve të grave dhe fëmijëve. Funksioni për këtë është aktiv vetëm për abonentët me pagesë.

Kritika për Grok nuk kanë ardhur vetëm nga Indonezia. Kryeministri australian, Anthony Albanese, ka dënuar përdorimin e AI-së për përmbajtje seksuale shfrytëzuese, duke e quajtur këtë praktikë “të neveritshme”. Autoritetet australiane për sigurinë online paralajmërojnë se do të përdorin ligjin për të hequr përmbajtjet e tilla dhe për të ndëshkuar shkelësit.

Indonezia, vendi me popullsinë më të madhe myslimane në botë, ka rregulla shumë të rrepta kundër shpërndarjes online të përmbajtjeve “obscene”, duke e bërë këtë masë një precedent për kontrollet e ardhshme mbi inteligjencën artificiale.