Ja çfarë ndodh me presionin e gjakut në trup nëse konsumoni çdo ditë banane

08:52, 24/05/2025

Bananet, përveçse një frut i shijshëm dhe praktik për ta marrë me vete, janë duke u kthyer gjithnjë e më shumë në një aleat të rëndësishëm për zemrën.

Një studim i publikuar së fundmi në ‘American Journal of Physiology-Renal Physiology’ thekson se konsumimi i rregullt i ushqimeve të pasura me kalium, si bananet, mund të ndihmojë në uljen dhe menaxhimin e tensionit të gjakut.

“Natriumi rrit presionin e gjakut dhe marrja e kaliumit e ul atë”, shpjegon Dr. Daniel Jones, profesor emeritus në Shkollën e Mjekësisë të Universitetit të Misisipit, për Veryëell Health. Kaliumi ndihmon trupin të eliminojë më shumë natrium nëpërmjet urinës, duke ndikuar në përmirësimin e presionit të gjakut.

Një banane mesatare përmban rreth 358 mg kalium, që përbën afërsisht 9% të nevojës ditore, por ekspertët theksojnë se vetëm bananet nuk mjaftojnë për të plotësuar nevojat e përditshme. Prandaj, rekomandohet një dietë e larmishme me ushqime të tjera të pasura me këtë mineral, si patatet, thjerrëzat, kajsitë e thata, dhe kungulli.

Ndërsa përfitimet e kaliumit janë të qarta për të gjithë, trupi i grave reagon ndryshe ndaj natriumit në krahasim me trupin e burrave. Yasi Ansari, dietologe e lartë në UCLA Health, thekson se “seksualiteti dhe mosha biologjike ndikojnë në mënyrën se si trupi përpunon kripën dhe kaliumin”. Ajo shton se gratë para menopauzës shpesh kanë një reagim më të butë ndaj konsumit të natriumit, por kjo ndryshon pas moshës 60 vjeç, kur rreziku për hipertension rritet ndjeshëm.

Përveç kaliumit, bananet janë një burim i mirë edhe për vitamina dhe fibra që ndihmojnë në tretje dhe shëndetin e zorrëve. Me 3 gramë fibra për banane dhe vitamina si C dhe B6, ato janë një zgjedhje ideale për një mëngjes të shëndetshëm apo një ushqim të shpejtë mes vakteve.

Dietologia Ansari sugjeron kombinimin e bananeve me ushqime të tjera si gjalpi i arrave, farat chia ose si pjesë e një smoothie ushqyes.

“Jo vetëm që janë të shëndetshme, por janë edhe jashtëzakonisht të lehta për t’u përfshirë në dietën e përditshme,” shton ajo.

Megjithëse janë të dobishme, ekspertët paralajmërojnë të mos e teproni me kaliumin. Marrja e tepruar mund të çojë në hiperkalemi, një gjendje e rrezikshme që ndodh kur ka shumë kalium në gjak. Në shumicën e rasteve, kjo ndodh nëse ekziston një problem i mëparshëm me veshkat ose përdorimi i tepruar i suplementeve. Syri.net-iefimerida