Shtetet e Bashkuara kanë konfirmuar vdekjen e parë nga fruthi që nga viti 2015, pasi një fëmijë i pavaksinuar humbi jetën gjatë një shpërthimi të virusit në një zonë rurale të Teksasit Perëndimor. Ky zhvillim alarmues vjen mes një rritjeje të rasteve të fruthit në vend dhe një tendence globale të rënies së vaksinimeve.
Normalisht, shumica e rasteve në SHBA importohen nga jashtë përmes udhëtarëve të infektuar, por këtë vit janë raportuar tashmë 124 raste në Teksas dhe 9 në Nju Meksiko. Në të gjithë vendin, numri i rasteve të fruthit është dyfishuar krahasuar me të gjithë vitin 2023, duke rritur shqetësimet për rikthimin e sëmundjes që dikur konsiderohej nën kontroll.
Sipas Qendrës për Kontrollin dhe Parandalimin e Sëmundjeve (CDC), shumica e shteteve amerikane kanë rënë nën pragun 95% të vaksinimit për fëmijët e vegjël, nivel kyç për të parandaluar përhapjen e fruthit në komunitete. “Fruthi kudo është një kërcënim kudo”, paralajmëron CDC.
Fruthi në rritje në mbarë botën
Tendenca shqetësuese nuk kufizohet vetëm në SHBA. Sipas Organizatës Botërore të Shëndetësisë (OBSH), në vitin 2023, rreth 10.3 milionë njerëz u infektuan me fruth dhe 107,500 vdiqën, kryesisht fëmijë të pavaksinuar nën moshën pesë vjeç. Shpërthimet më të mëdha u raportuan në Afrikë, Lindjen e Mesme dhe Azi, ku qasja në vaksina mbetet e kufizuar.
Fruthi është përhapur gjithashtu në vende ku më parë ishte eliminuar. Në vitin 2023, 57 vende raportuan shpërthime të mëdha, përfshirë Indinë, Indonezinë, Rusinë, Jemenin dhe Irakun. Republika Demokratike e Kongos (DRC) regjistroi numrin më të lartë të rasteve, me 311,500 infeksione.
Evropa përballet me shpërthime alarmante
Edhe Evropa po përjeton një rritje të ndjeshme të rasteve. Në tre muajt e parë të vitit 2024, fruthi u regjistrua në 45 nga 53 vendet e rajonit evropian të OBSH-së, duke arritur në 57,000 raste dhe katër vdekje.
Në Britani, numri i rasteve të konfirmuara arriti në 2,911, shifra më e lartë vjetore që nga 2012-a. “Edhe një rast i vetëm i fruthit duhet të jetë një thirrje urgjente për veprim”, deklaroi Hans Kluge, drejtori i OBSH-së për Evropën.
A po ndikon rënia e vaksinimeve?
Pandemia COVID-19 shkaktoi ndërprerje në programet e imunizimit, duke ulur shkallën globale të vaksinimit të fëmijërisë nga 86% në 2019 në 83% në 2023. Ekspertët thonë se kjo ka ndikuar drejtpërdrejt në rritjen e rasteve të fruthit.
Sipas OBSH-së, vaksinimi ka parandaluar mbi 60 milionë vdekje mes viteve 2000 dhe 2023. Para se vaksina të prezantohej në vitin 1963, epidemitë e fruthit shkaktonin rreth 2.6 milionë vdekje në vit.
Megjithatë, shkalla e ulët e vaksinimit po minon përpjekjet për çrrënjosjen e sëmundjes. OBSH thekson se për të parandaluar shpërthimet e fruthit, nevojitet një shkallë imunizimi prej të paktën 95%, pasi virusi është jashtëzakonisht ngjitës dhe mund të infektojë 9 nga 10 persona të pavaksinuar.
Rritja e rasteve të fruthit në SHBA dhe në mbarë botën është një kujtesë e fortë për rëndësinë e vaksinimit dhe masave të parandalimit për të shmangur rikthimin e sëmundjeve që mund të kontrollohen me vaksina.
© SYRI.net
Denonco
Merrni lajmet më të fundit nga SYRI.net në çdo moment dhe kudo që të jeni!
Gjunjët ju dhembin ose ju mungon stabiliteti? Tre ushtrime të thjeshta që ndihmojnë në forcimin e tyre
Dehidratimi tek fëmijët në verë, rreziku që shpesh ngatërrohet me lodhjen e zakonshme
Botoxi dhe frika e re: a mund të ndikojë në tru?