Modriç drejt largimit nga Milani, roli që ia garantojnë te Real Madridi

E ardhmja e Luka Modriçit duket gjithnjë e më larg Milanit dhe gjithashtu gjithnjë e më pranë një rikthimi te Real Madridi, këtë herë jo si lojtar, por në një rol drejtues. Mesfushori kroat, që mbushi 40 vjeç, po mendon seriozisht fundin e karrierës së tij si futbollist, i cili pritet të vijë pas Kupës së Botës me Kroacinë.

Te Milani, Modriç ka qenë një nga shtyllat kryesore të ekipit të Massimiliano Allegrit, me 35 paraqitje, shumica si titullar, duke shënuar 2 gola dhe dhënë 3 asistime, duke ndihmuar skuadrën të qëndrojë në zonën e Champions League për një pjesë të mirë të sezonit. Megjithatë, dëmtimi në fytyrë ndaj Juventusit dhe rënia e formës së ekipit kanë ndikuar në ecurinë e fundit të sezonit, duke humbur pjesëmarrjen në Champions në javën e fundit.

Kontrata e tij me Milanin skadon më 30 qershor dhe qëndrimi i tij në Milano duket shumë i vështirë.

Sipas raportimeve nga gazeta spanjolle “AS”, Real Madridi po mendon t’i ofrojë kroatit një rikthim në klub, por këtë herë në zyrat drejtuese. Presidenti Florentino Pérez i kishte premtuar më herët Modriçit se dyert e klubit do të mbeteshin gjithmonë të hapura për të, pas përfundimit të karrierës së tij si futbollist.

Në “Bernabéu” po shqyrtohen dy role të mundshme për kroatin: drejtor sportiv ose këshilltar i klubit. Përvoja e tij e madhe, njohja e thellë e futbollit dhe lidhja e fortë me tifozët e Real Madridit e bëjnë atë një kandidat ideal për një rol të tillë.

Kështu, pas një karriere legjendare në fushë, Modriç mund të nisë një kapitull të ri pikërisht aty ku arriti majat e futbollit botëror.

© SYRI.net

Lexo edhe:

• VIDEO/ Shpërthejnë golat në pjesën e dytë, si ndryshon rezultati në Holandë-Suedi
• Casemiro i thotë lamtumirë Europës, gati të bashkohet me Messin tek Inter Miami
• Statistikat më të çmendura të Botërorit 2026: Turqia e mallkuar, Ronaldo në krizë dhe rekorde që duken të pabesueshme