Ambasada e SHBA në Tiranë, në një deklaratë publike ka shprehur mbështetjen e saj për raportin e OSBE-ODIHR për zgjedhjet e 14 majit.
Ambasada shprehet se, mbështet kritikat, si dhe ka kërkuar që të adresohet problemi i blerjes së votave dhe i përdorimit të burimeve shtetërore në favor të palës në pushtet.
Deklarata e ambasadës së SHBA:
Ambasada e SHBA mirëpret raportin e fundit të ODIHR-it për zgjedhjet vendore të 14 majit që përshkruan fushat me përmirësim të vazhdueshëm, si dhe mangësitë.
Shtetet e Bashkuara nxisin qeverinë, partitë politike dhe institucionet shtetërore të zbatojnë rekomandimet e ODIHR-it, të cilat përfshijnë keqpërdorimin e burimeve shtetërore në nivel qendror dhe vendor, akuzat për blerje votash nga të gjitha palët, marrjen e masave për të siguruar fshehtësinë e votimit dhe parandalimin e frikësimit të votuesve, si dhe presionin mbi punonjësit e sektorit publik dhe votuesit.
Raporti theksoi gjithashtu nevojën për të siguruar zbatimin e ligjit për të drejtën e informimit në mënyrën e duhur, dekriminalizimin e shpifjes, si dhe mbështjetjen e gazetarisë së pavarur. Shtetet e Bashkuara mbështesin angazhimin për të trajtuar të gjitha rekomandimet e ODIHR-it, në mënyrë që të sigurohet një kuadër zgjedhor gjithëpërfshirës dhe konsekuent si dhe kërkesat e popullit shqiptar për një demokraci të fortë.
© SYRI.net