Meta viziton Kosovën, Kuvendi mban seancë solemne

07:37, 22/07/2022

Kuvendi i Kosovës sot do të mbajë seancë të veçantë ku presidenti në largim i Shqipërisë, Ilir Meta, do të mbajë një fjalim para deputetëve kosovarë.

Meta po e përfundon mandatin e tij duke ia lënë vendin Bajram Begajt, dhe sot viziton Kosovën për herë të fundit në këtë mandate.

Ai fillimisht do të pritet nga homologja e tij, Vjosa Osmani, dhe pastaj edhe nga kryeparlamentari, Glauk Konjufca.

Në përmbyllje të vizitës së tij, ai bashkë me Osmanin do të jetë pjesë e hapjes solemne të Manifestës.

Policia e Kosovës nëpërmjet një njoftimi ka bërë të ditura angazhimet e saj për përcjelljen dhe sigurinë e presidentit Meta.

“Në kohën e ardhjes (pasdite) me 21 korrik, për të mundësuar qarkullim të lirë të eskortës zyrtare nën përcjellje dhe sigurim sipas itinerarit të lëvizjes, Policia e Kosovës do të bëjë ndërprerje të përkohshme, në intervale të shkurta kohore të qarkullimit të trafikut në disa segmente rrugore ku pritet të kalojë eskorta. Po ashtu edhe në ditën e kthimit, më 23 korrik, sipas agjendës zyrtare do të ndërmerren veprimet e njëjta policore, të lëvizjes së eskortës, në rrugët të cilat përdoren për qarkullim të eskortës”, thuhet në njoftimin e policisë.

Me këtë rast, Policia e Kosovës ka kërkuar mirëkuptim të plotë nga ana e qytetarëve dhe pjesëmarrësve në trafik.

© SYRI.net

Lexo edhe:

• Shërbimi Korrektues i Kosovës shpërblen me kontratë njëburimore “Beni Donën”, vlera mbi 360 mijë euro
• BE: Rezultatet në dialog s’janë dështim i Lajçakut, por i Kosovës dhe Serbisë që s’e mbajtën fjalën
• Kurti i thotë Scholzit se shpreson në mbështetjen e Gjermanisë për anëtarësimin e Kosovës në Këshillin e Evropës