Reperi dhe biznesmeni i njohur amerikan Sean “Diddy” Combs do të vazhdojë të qëndrojë në burg pas vendimit të një gjykatësi federal për t’i mohuar kërkesën për lirim me kusht, pavarësisht se një juri e shpalli atë të pafajshëm për akuzat më të rënda të organizimit kriminal dhe trafikimit seksual.
Diddy u shpall fajtor për akuzën e transportimit për t’u përfshirë në prostitucion një vepër penale federale por juria nuk gjeti prova të mjaftueshme për ta dënuar për akuzat që mbanin peshën më të madhe ligjore: drejtimi i një organizate kriminale dhe trafikimi seksual, të cilat mund të sillnin burgim të përjetshëm.
Vendimi për të mos e liruar me kusht u mor nga gjykatësi federal Arun Subramanian, i cili theksoi se “vetë mbrojtja ka pranuar raste dhune në marrëdhëniet personale të Combs”, duke shtuar se ekziston rreziku që ai të përbëjë një kërcënim për komunitetin dhe viktimat që dëshmuan në gjyq.
Avokatët e reperit argumentuan se klienti i tyre nuk përbën rrezik për arratisje dhe theksuan se ai nuk ka qenë i përfshirë në dhunë që nga viti 2018. Ata shtuan se Combs kishte marrë pjesë vullnetarisht në një program rehabilitimi për autorët e dhunës në familje, përpara arrestimit të tij në shtator 2024.
Por këto argumente nuk bindën gjykatësin, sidomos pas një letre të paraqitur nga ish-partnerja e tij, këngëtarja Casandra Ventura, e cila e përshkroi Diddy-n si një rrezik serioz për sigurinë e saj dhe të viktimave të tjera.
Dëshmitë tronditëse gjatë gjyqit
Në një gjyq që zgjati shtatë javë në gjykatën federale të Nju Jorkut, prokuroria paraqiti më shumë se 30 dëshmitarë përfshirë Ventura-n, reperin Kid Cudi, ish-punonjës të Diddy-t, dhe staf sigurie të hoteleve.
Në qendër të akuzave ishte një video e vitit 2016 ku Diddy shihej duke rrahur dhe zvarritur Ventura-n në korridorin e një hoteli në Los Angeles video që sipas dëshmisë, ai përpiqej ta fshinte duke paguar rojet.
Dëshmia më tronditëse erdhi nga vetë Ventura, e cila dëshmoi tetë muaj shtatzënë. Ajo përshkroi sesi ishte detyruar të merrte pjesë në "freak-offs" situata ku ajo duhej të kryente akte seksuale me meshkuj të tjerë ndërsa Diddy shikonte dhe regjistronte.
Sipas prokurorisë, Combs kishte ndërtuar një rrjet të ngushtë bashkëpunëtorësh që ndihmonin në organizimin e këtyre akteve, duke përfshirë drogim të grave, manipulim psikologjik dhe shantazh. Këto veprime përbënin thelbin e akuzës për organizim kriminal nën ligjin federal RICO.
Juria u tërhoq për diskutim për 13 orë para se të arrinte vendimin:
Fajtor për akuzën e transportimit me qëllim për prostitucion
I pafajshëm për trafikim seksual
I pafajshëm për organizim kriminal
Dy akuza të tjera u refuzuan për mungesë provash të mjaftueshme
Juristët u shprehën se kishin "mendime të palëkundura" në lidhje me akuzën e organizimit kriminal, duke e cilësuar atë si më të ndërlikuarën.
Kur u shpall vendimi, Combs ra në gjunjë, mbështeti kokën në karrige dhe u pa i tronditur, duke u lutur dhe duke u dridhur.
Ai do të vazhdojë të mbahet në burgun federal në Brooklyn, ku ndodhet që nga arrestimi në shtator të vitit të kaluar. Shpallja përfundimtare e dënimit është parashikuar për 3 tetor 2025, ku ai mund të përballet me deri në 20 vjet burg.
Sean Combs, i lindur në Harlem, është themelues i labelit Bad Boy Records, që ka prodhuar yje të mëdhenj si Notorious B.I.G. dhe Usher. Ai gjithashtu ka ndërtuar një perandori biznesi që përfshin modën (Sean John), pijet alkoolike dhe mediat.
Pavarësisht suksesit të tij si artist dhe sipërmarrës, Combs është përballur vitet e fundit me një sërë akuzash civile për dhunë seksuale, ngacmime dhe dhunë në marrëdhënie. Ky proces gjyqësor federal ishte rasti më i rëndësishëm penal që mund ta përkufizojë përfundimisht trashëgiminë e tij publike dhe ligjore./BBC
© SYRI.net
Denonco
Merrni lajmet më të fundit nga SYRI.net në çdo moment dhe kudo që të jeni!
Cllevio dëshmon në GJKKO: Lajmin për shpërthimin me tritol te lokali i Noizyt e mora vesh nga shokët
Bia Khalifa publikon videon e 'sherrit' me gjyshen: Më kërkohen para, nuk do gjej kurrë paqe
Pasuria e Liam Payne i kalon djalit të tij 9-vjeçar