Anëtarët e grupit The Beach Boys, Al Jardine dhe Mike Love, i bënë homazh të ndjerë kompozitorit të ndjerë, duke e cilësuar atë si një “gjigant të përulur muzikor”.
Pas ndarjes nga jeta në moshën 82-vjeçare, miqtë dhe bashkëthemeluesit e grupit The Beach Boys kanë qenë ndër të parët që nderuan kujtimin e Brian Wilson, një prej figurave më me ndikim në muzikën popullore amerikane.
Duke folur për emisionin Today të BBC-së, Al Jardine e përshkroi Wilson-in si “një zotëri të vërtetë, një intelekt të rrallë muzikor, që i mësoi botës si të buzëqeshte”.
Jardine shtoi: “Ai ishte një gjigant i përulur në muzikë... nuk kërkonte vëmendje, ishte i përqendruar vetëm në krijimin e muzikës më të mirë të mundshme.”
Ai kujtoi ditët e para të grupit, duke thënë se ai, së bashku me vëllezërit Wilson dhe kushëririn e tyre Mike Love, “u bëmë një familje e madhe e lumtur. Filluam në një mënyrë shumë modeste, duke kënduar për gjëra të zakonshme si sërfi, makinat dhe vajzat. Sa më shumë rritej suksesi ynë, aq më shumë rritej edhe ai si krijues – në mënyrë eksponenciale, me çdo album të ri.
Ai mësoi të shkruante në mënyrë krijuese dhe na mësoi me të njëjtën energji se si ta interpretonim muzikën. Dinte si të nxirrte më të mirën nga secili prej nesh. Ishte një mësues i mirë, një mentor i shkëlqyer, një aranzhues, producent – ai ishte vetë zemra e grupit.”
Mike Love, në homazhin e tij të shkruar, deklaroi: “Sot, bota humbi një gjeni, dhe unë humba një kushëri të gjakut dhe partnerin tim në muzikë. Brian Wilson nuk ishte vetëm zemra e Beach Boys – ai ishte shpirti i tingullit tonë. Që nga hera e parë që kënduam së bashku si fëmijë në dhomën time të ndenjes, e ndieja se kishte diçka të jashtëzakonshme tek ai. Dhuntitë e tij muzikore ishin të pakrahasueshme. Meloditë që krijonte, emocionet që derdhte në çdo notë – Brian e ndryshoi përgjithmonë rrjedhën e muzikës.”
Love pranoi se marrëdhënia e tyre kishte pasur “ulje-ngritje” – ai kishte paditur Wilson disa herë dhe kishte arritur një marrëveshje jashtë gjykate, pasi kishte pretenduar shpifje në kujtimet e Wilson të vitit 1991. Por, shtoi ai, “ne kurrë nuk ndaluam së dashuruari njëri-tjetrin, dhe unë kurrë nuk ndalova së mahnituri nga ajo që ai arrinte të krijonte kur ulej në piano apo nga spontaniteti i tij në studio.”
Vajza e Brian Wilson-it, Carnie, shkroi: “Babai im ishte çdo fije e qenies sime. Ai do të mbahet mend nga miliona njerëz deri në fund të kohës. Jam me fat që isha vajza e tij dhe që patëm një lidhje shpirtërore që do të jetojë përgjithmonë. Nuk kam ndier kurrë më parë një dhimbje të tillë, por e di që ai po pushon atje lart, në parajsë.”
Bob Dylan tha se kishte “menduar për të gjitha vitet që e kam dëgjuar dhe kam admiruar gjenialitetin e tij”. Carole King e quajti “mik dhe vëlla në shkrimin e këngëve”, ndërsa Mick Fleetwood, drejtuesi i grupit Fleetwood Mac, shkroi: “Kushdo që ka një ndjeshmëri muzikore duhet të jetë mirënjohës për prekjen magjike dhe gjeniale të Brian Wilson! Dhe të trishtuar për këtë humbje të madhe që ndjeu e gjithë bota!”
Muzikanti dhe regjisori Questlove u shpreh: “Nëse ka ekzistuar ndonjë qenie njerëzore që krijoi art nga trishtimi i papërshkrueshëm… i bekuar qoftë, ai ishte Brian Wilson.”
Elton John kujtoi bashkëpunimin e tyre, kur Wilson kontribuoi me harmoni vokale në albumin e vitit 2010 The Union, që John realizoi me Leon Russell. “E doja si person, dhe për mua ai ishte ndikimi më i madh në mënyrën time të të shkruarit të këngëve,” shkroi ai. “Ai ishte një gjeni muzikor dhe një revolucionar. E ndryshoi mënyrën si kuptohej shkrimi i këngëve dhe i dha formë të re muzikës përjetësisht. Një gjigant i vërtetë.”
© SYRI.net
Denonco
Merrni lajmet më të fundit nga SYRI.net në çdo moment dhe kudo që të jeni!
Cllevio dëshmon në GJKKO: Lajmin për shpërthimin me tritol te lokali i Noizyt e mora vesh nga shokët
Bia Khalifa publikon videon e 'sherrit' me gjyshen: Më kërkohen para, nuk do gjej kurrë paqe
Pasuria e Liam Payne i kalon djalit të tij 9-vjeçar