Zyrtari i Ministrisë së Tregtisë dhe Industrisë, i cili u suspendua nga kjo ministri dyshohet së është Fidan Kadriu, për të cilin thuhet se ka falsifikuar licenca të naftës, duke i mashtruar kompanitë dhe duke u marr para.
Sipas burimeve brenda kësaj ministrie të Syri.net Kosova, Kadriu, u ka marr kompanive të naftës para, duke iu premtuar se ua ka renovuar licencën, e në fakt licencat janë falsifikuar.
Në Kadriun ishte ankuar një kompani, që nuk iu kishte kryer puna dhe kjo ka alarmuar ministrinë.
Kadriu dyshohet se u merrte para kompanive, i fuste në sistem, ua nxirrte licencën, po parat nuk i shkonin arkës së shtetit, po atij personalisht.
Ministria ka krijuar një komision dhe e ka suspenduar Kadriun.
Po ashtu të hënën e kësaj jave janë thirrur krimet ekonomike të Policisë së Kosovës për tu marr me rastin.
Pas dyshimeve që ishin ngritur me licenca, në ministri ka ardhur edhe Zyra Kombëtare e Auditorit, duke i marr lendet për verifikim.
Edhe pse Syri. net Kosova ka tentuar që të kontaktoi me të apostrofuarin, i njëjti nuk ka qenë i qasshëm.
Fidan Kadriu është zyrtar i Departamentit të Naftës në MTI.
Kadriu është anëtar i NISMA-së Social Demokrate, dhe motra e tij është kryetare e gruas së Nismas në Gjilan dhe asambleiste në Kuvendin Komunal të Gjilanit.
Kadriu në MTI u punësua në kohën kur Endrit Shala ishte ministër.
E lidhur me suspendimin e tij, sot ka njoftuar zyrtarisht edhe MTI përmes një komunikate për medie.
Ministria e Tregtisë dhe Industrisë (MTI) sqaron për opinionin publik dhe media se ka ndërmarrë të gjitha masat ndaj zyrtarit të MTI-së, të dyshuar për keqpërdorim të pozitës zyrtare gjatë procesit të shpërndarjes së licencave të disa kompanive private, që ushtrojnë veprimtarinë e tregtimit të derivateve të naftës, thuhet në njoftim.
Sipas njoftimit, MTI rastin e ka proceduar në Drejtorinë për Hetimin e Krimeve Ekonomike dhe të Korrupsionit.
“Përveç procedimit të lëndës në organet e lartpërmendura, zyrtarit në fjalë i është shqiptuar masa disiplinore “Largim nga shërbimi civil”, për të mos e penguar procesin e hetimeve të organeve kompetente deri në zbardhjen e plotë të rastit.”, thuhet mes tjerash në njoftim./Syri.net Kosova.
© SYRI.net