Thellohen tensionet me SHBA e Izraelin! Franca thërret ambasadorin amerikan pas akuzave për antisemitizëm

Franca thirri ambasadorin amerikan Charles Kushner pasi ky i fundit i dërgoi një letër presidentit Emmanuel Macron, duke e akuzuar se vendi nuk ka bërë mjaftueshëm për të frenuar dhunën antisemitike, njoftoi të dielën një zëdhënës i Ministrisë së Jashtme franceze.

Kushner, i cili është hebre dhe babai i Jared Kushnerit – bashkëshorti i vajzës së presidentit amerikan Donald Trump – botoi letrën e hapur në Wall Street Journal, duke thelluar tensionet mes Francës, SHBA-së dhe Izraelit.

Në letër, ambasadori kujtoi se e hëna shënonte “81-vjetorin e Çlirimit të Parisit nga Aleatët, që i dha fund deportimit të hebrenjve nga territori francez” gjatë pushtimit nazist.

“Shkruaj nga shqetësimi i thellë për rritjen dramatike të antisemitizmit në Francë dhe mungesën e veprimeve të mjaftueshme nga qeveria juaj për ta përballuar atë”, theksoi ai, duke shtuar se “në Francë, nuk kalon ditë pa u sulmuar një hebre në rrugë, pa u vandalizuar sinagoga, shkolla apo biznese hebreje.”

Kushner i bëri thirrje Macronit të zbatojë më me vendosmëri ligjet kundër krimeve të urrejtjes dhe të zbusë kritikat ndaj Izraelit, duke theksuar se deklaratat e qeverisë franceze për njohjen e një shteti palestinez kanë nxitur incidente antisemitike.

Sipas tij, antisemitizmi në Francë “ka shpërthyer që nga sulmi barbar i Hamasit më 7 tetor 2023”, i cili shkaktoi luftën e vazhdueshme në Gaza.

“Franca i hedh poshtë me vendosmëri këto akuza” – thuhet në reagimin zyrtar të Ministrisë së Jashtme franceze, që e cilësonte letrën “të papranueshme”. Ministria theksoi se ambasadori Kushner do të thirret të hënën (25 gusht) dhe kujtoi se Konventa e Vjenës e vitit 1961 ndalon diplomatët të ndërhyjnë në punët e brendshme të vendeve pritëse.

Letra e Kushnerit pason një tjetër letër të kryeministrit izraelit Benjamin Netanyahu drejtuar Macronit, ku ai e akuzonte presidentin francez se po nxit antisemitizmin duke kërkuar njohjen ndërkombëtare të një shteti palestinez, sipas Jerusalem Post. Macron është ndër kritikët më të zëshëm të Netanyahu-t për mënyrën e zhvillimit të luftës në Gaza, veçanërisht për viktimat civile palestineze, ndërsa Trump ka qëndruar në krah të plotë të kryeministrit izraelit.

“Deklaratat publike që sulmojnë Izraelin dhe gjestet drejt njohjes së një shteti palestinez i japin kurajo ekstremistëve, nxisin dhunë dhe rrezikojnë jetën e hebrenjve në Francë. Në botën e sotme, anti-sionizmi është antisemitizëm – qartë e thjeshtë”, shkroi Kushner.

Presidenti Macron ka dënuar publikisht antisemitizmin si në kundërshtim me vlerat franceze dhe ka forcuar masat e sigurisë për të mbrojtur sinagogat dhe qendrat hebreje pas incidenteve të lidhura me konfliktin në Gaza.

Franca është vendi me popullsinë më të madhe hebreje në Evropën Perëndimore, rreth gjysmë milioni banorë, dhe gjithashtu ka një komunitet të konsiderueshëm mysliman të ndjeshëm ndaj vuajtjeve të palestinezëve në Gaza. Të dy komunitetet raportojnë rritje të krimeve të urrejtjes që nga ofensiva izraelite kundër Hamasit.

Njoftimi i Macronit se Franca do të njohë zyrtarisht shtetin palestinez gjatë një takimi në OKB në shtator solli një reagim të menjëhershëm negativ nga Izraeli. Me këtë hap, Franca pritet t’i bashkohet listës së vendeve që ka ardhur duke u zgjeruar që prej fillimit të luftës në Gaza gati dy vite më parë.

Sipas një raporti të New York Times, aktualisht të paktën 147 nga 193 vendet anëtare të OKB-së e njohin ose planifikojnë ta njohin shtetin palestinez./The Guardian/ 

© SYRI.net

Lexo edhe:

• Irani rihap pjesën perëndimore të hapësirës ajrore të vendit
• Raundi i 5-të i bisedimeve Liban-Izrael fillon në Washington
• Turqia arreston mbi 200 persona para samitit të NATO-s