Lajme në pak minuta: Çfarë po ndodh në botë

Firmoset armëpushimi i përkohshëm mes Izraelit dhe Libanit

Presidenti i SHBA-së, Joe Biden, e quajti marrëveshjen e armëpushimit mes Izraelit dhe Hezbollahut “lajm të mirë” në një fjalim në të martën. Ai tha se pauza, e cila hyri në fuqi në orën 4:00 të mëngjesit, sipas kohës lokale të mërkurën, është menduar “për të qenë një ndërprerje e përhershme e armiqësive.”

Të martën, Këshilli i Sigurisë i Izraelit miratoi marrëveshjen e armëpushimit në Liban me një votë 10-1, pas rekomandimit të Kryeministrit Benjamin Netanyahu.

Biden tha se në 60 ditët e ardhshme, ushtria libaneze dhe forcat e sigurisë të shtetit do të dislokohen dhe do të marrin kontrollin e territorit të tyre.

“Infrastruktura terroriste e Hezbollahut në jug të Libanit nuk do të lejohet të rinovohet. Dhe gjatë 60 ditëve të ardhshme, Izraeli do të tërheqë gradualisht forcat e tij të mbetura. Dhe qytetarët nga të dyja palët do të mund të kthehen së shpejti në komunitetet e tyre në mënyrë të sigurt.”

SHBA ka qenë një mbështetës i palëkundur i Izraelit, dhe Biden e theksoi këtë qëndrim duke thënë se, nëse “Hezbollah ose kushdo tjetër shkel marrëveshjen dhe paraqet një kërcënim të drejtpërdrejtë për Izraelin, atëherë Izraeli mban të drejtën e vetëmbrojtjes.”

Ky qëndrim pasqyron deklaratën e Netanyahu-s pas rekomandimit të tij për Këshillin, ku ai paralajmëroi se “koha e armëpushimit varet nga ajo që do të ndodhë në Liban.”

Parlament Europian riafirmon mbështetjen ndaj Ukrainës

Deputetët e Parlamentit Evropian riafirmuan mbështetjen për Ukrainën të martën, duke dënuar bashkëpunimin ushtarak midis Rusisë dhe Koresë së Veriut dhe duke kërkuar nga blloku që të rrisë mbështetjen për forcat e Ukrainës që janë në luftë.

Votimi erdhi pas një fjalimi të drejtpërdrejtë të Presidentit të Ukrainës, Volodymyr Zelenskyy, i cili tha se “Putin ka sjellë 11,000 trupa koreano-veriore në kufirin e Ukrainës” dhe se “kontingjenti mund të rritet deri në 100,000.”

Shumë nga këto trupa janë dislokuar kohët e fundit si pjesë e njësive ruse në rajonin e Kurskut – ku Ukraina ka lansuar një depërtim befasues në gusht, por tani raportohet se po humbasin terren.

Një deklaratë e lëshuar nga liderët e Parlamentit Evropian së fundmi i bëri thirrje bllokut që të “rrisë mbështetjen për Ukrainën në çdo mënyrë, përfshirë politikisht, financiarisht, ushtarakisht dhe me ndihmën humanitare.” PE gjithashtu riafirmoi se parlamenti “ndodhet pranë dhe mbështet Ukrainën në çdo mënyrë të mundshme deri në fitoren e saj.”

Gjermania planifikon ndërtimin e bunkierëve kudo në vend

Gjermania po harton një listë të ndërtesave publike dhe private që mund të shndërrohen në bunkerë nëse është e nevojshme, tha të mërkurën Ministria e Brendshme e vendit.

Lista do të përfshijë parkime, stacione metrosh, ndërtesa shtetërore dhe prona private.

Gjithashtu, ishte parashikuar një aplikacion telefonik me një katalog dixhital të bunkerëve dhe strehimeve emergjente, tha një zëdhënës, duke shtuar se qytetarët do të inkurajoheshin gjithashtu të konvertojnë bodrumet dhe garazhet e tyre në strehime.

Plani u raportua për herë të parë të hënën nga tabloidi gjerman BILD, i cili e cilësoi si një përgjigje ndaj përkeqësimit të kërcënimit ndërkombëtar, veçanërisht nga Rusia.

Një zëdhënës i ministrisë nuk e përmendi një përkeqësim të situatës së sigurisë, por tha se plani ishte një projekt i madh që do të merrte kohë dhe do të përfshinte autoritete të shumta.

Organizatat e mbrojtjes civile në Gjermani kanë kërkuar zgjerimin e strehimeve antiaerore në vend, i cili aktualisht ka 579 bunkerë – shumica e të cilëve datojnë nga Lufta e Dytë Botërore.

Angela Merkel publikon librin me kujtimet e saj

Në kujtimet e saj të publikuara të martën, ish-Kancelarja gjermane Angela Merkel reflekton mbi “lojërat e fuqisë” të Vladimir Putinit gjatë viteve, tregon takime kontrastante me Barack Obamën dhe Donald Trumpin, dhe pyet veten nëse mund të kishte bërë më shumë për të shmangur Brexit-in.

Merkel, 70 vjeçe, duket se nuk ka shumë hezitim për vendimet kyçe që mori gjatë mandatit të saj historik 16-vjeçar si udhëheqëse e një prej fuqive kyçe ekonomike dhe politike të Europës, që përfshinin menaxhimin e krizave financiare globale, kaosin e borxhit në Evropë, krizën e refugjatëve 2015-2016 dhe pandeminë e COVID-19.

Libri i saj, i titulluar Liria, ofron një narrativë të thjeshtë për vitet e saj të para në Gjermaninë Lindore komuniste dhe karrierën e saj politike, të ndërthurur me raste humori.

Merkel kujton se si Putin e la në pritje në samitin e Grupit të Tetë që ajo e organizoi në vitin 2007: “Nëse ka një gjë që nuk mund ta durosh, ajo është mosrespektimi i kohës.” Ajo tregon gjithashtu një vizitë në vendpushimin rus të Detit të Zi, Sochi, atë vit, ku labradori i Putinit shfaqej gjatë mundësisë për një foto, megjithatë, Putin e dinte shumë mirë që ajo kishte frikë nga qentë.

© SYRI.net

Lexo edhe:

• Porsche ndryshon strategjinë: më pak makina në treg, më shumë fitim
• Dy të mitur gjenden të vdekur në makinë për shkak të valës së të nxehtit në Francë
• Inteligjenca artificiale dhe gazetaria, rasti që tronditi median gjermane