Australia ka propozuar një kufizim të ri për përdoruesit e mediave sociale, duke i vendosur një moshë minimale prej 16 vjeç për të krijuar llogari dhe përdorur platformat më të njohura sociale. Ky projektligj është propozuar nga vetë kryeministri Anthony Albanese dhe është miratuar në kabinetin australian të hënën.
Në një deklaratë për shtyp, kryeministri Albanese tha: "Mediat sociale po u bëjnë dëm fëmijëve tanë dhe është koha të veprojmë. Kam folur me mijëra prindër, gjyshër, halla dhe xhaxhallarë, dhe ata, si unë, janë të shqetësuar për sigurinë e fëmijëve në internet."
Sipas projektligjit, mosha minimale për përdorimin e rrjeteve sociale do të jetë 16 vjeç. Ky ligj do të hyjë në fuqi 12 muaj pas miratimit nga deputetët, dhe nuk do të parashikohen përjashtime për fëmijët që mund të kenë lejen e prindërve për të hapur një llogari në platformat sociale.
Kryeministri Albanese ka theksuar shqetësimet lidhur me ndikimin e algoritmeve të mediave sociale, të cilat shfaqin përmbajtje të papërshtatshme për fëmijët dhe adoleshentët.
"Ka gjëra që shfaqen në telefonin tim që nuk dua t’i shoh. Imagjinoni një fëmijë 14-vjeçar të pambrojtur," shpjegoi ai më herët. Sipas këtij ligji, kompanitë e mediave sociale do të kenë përgjegjësinë për të siguruar që përdoruesit e tyre të jenë mbi 16 vjeç. Në të kundërt, ato do të përballen me ndëshkime të mundshme.
Ky vendim vjen pas një shqetësimi të vazhdueshëm rreth sigurisë të fëmijëve dhe ndikimit të mundshëm të internetit dhe rrjeteve sociale mbi shëndetin mendor dhe emocional të të rinjve. Sipas autoriteteve australiane, ky ligj synon të mbrojë fëmijët nga përmbajtja e dëmshme dhe të krijojë një mjedis më të sigurt për ata që përdorin internetin.
© SYRI.net
Denonco
Merrni lajmet më të fundit nga SYRI.net në çdo moment dhe kudo që të jeni!
Porsche ndryshon strategjinë: më pak makina në treg, më shumë fitim
Dy të mitur gjenden të vdekur në makinë për shkak të valës së të nxehtit në Francë
Inteligjenca artificiale dhe gazetaria, rasti që tronditi median gjermane