Freiburgu dhe Aston Villa përballen mbrëmjen e sotme në finalen e Europa League, në një duel që premton spektakël dhe emocione në Stamboll.

Skuadra gjermane vjen në këtë finale me ëndrrën për të fituar trofeun e parë madhor në historinë e klubit.

Freiburgu ka kaluar një formë fantastike javët e fundit, duke realizuar nëntë gola në tri ndeshjet e fundit dhe duke siguruar edhe pjesëmarrjen në Europë për sezonin e ardhshëm.

Në stol, trajneri Julian Schuster shkruan historinë si trajneri më i ri gjerman në 24 vitet e fundit që drejton një skuadër në një finale europiane.

Megjithatë, përvoja mungon si për teknikun ashtu edhe për klubin, pasi kjo është vetëm finalja e dytë madhore në historinë e Freiburgut.

Nga ana tjetër, Aston Villa vjen si favorite falë eksperiencës dhe formës së shkëlqyer.

Skuadra angleze, e drejtuar nga specialisti i Europës Unai Emery, synon të rikthejë lavdinë europiane pas dekadash. Emery ka fituar katër herë këtë kompeticion dhe konsiderohet arma më e fortë e “Villas” në këtë finale.

Statistikat favorizojnë anglezët, pasi skuadrat angleze kanë fituar tetë nga dhjetë finalet europiane ndaj klubeve gjermane. Gjithsesi, Freiburgu shpreson të shkruajë historinë në natën më të rëndësishme të klubit.