Joao Felix ka kompletuar huazimin te Barcelona në ditën e fundit të afatit kalimtar veror nga Atletico Madridi.

Dëshira e portugezit ishte vetëm Barcelona dhe përkundër ofertave të tjera ai priti deri në fund për t’iu bashkuar katalanasve.

Felix në momentin e prezantimit te gjiganti katalanas deklaroi se ka bërë realitet një ëndërr fëmijërore.

“Të gjithë e dinë se sa i lumtur jam. Unë kam punuar për të qenë në këtë klub. Është një ëndërr e fëmijërisë, kam ardhur këtu për të ndihmuar dhe shpresoj se do të jetë një sezon i mrekullueshëm”, tha Felix në momentin e prezantimit.

Por tani mediumi spanjoll “Mundo Deportivo” ka zbuluar se Felix ka refuzuar tre skuadra nga Premier League për Barcelonën.

Manchester United, Aston Villa dhe Liverpool ishin tre skuadrat që tentuan transferimin e portugezit, por vetë Felix ishte ai që i refuzoi.

Për më tepër ‘The Reds’ ishin të gatshëm për një shkëmbim mes tij dhe Darwin Nunez.

Por, në fund gjithçka shkoi sipas planeve të Felix, i cili ishte i qartë për objektivin e tij dhe idenë për të luajtur vetëm me Barçën.