“I denjë për Tiranën” quhet dokumentari dedikuar ish-futbollistit të mirënjohur të Tiranës, Skënder Hyka, që do të promovohet ditën e enjte në ora 12:00 në sallën e konferencave të Shtëpisë së Futbollit.

Dokumentari kushtuar ish-lojtarit të famshëm është realizuar me regji të Osman Mulës dhe me mbështetjen e FSHF-së e në kujdesin e veçantë të Presidentit Duka.

Skënder Hyka lindi në vitin 1944 në Tiranë dhe ka luajtur ka luajtur futboll me të gjitha nivelet e klubit të Tiranës, që nga ekipet e moshave dhe deri tek skuadra e parë, duke qenë nga futbollistët kryesore të klubit në vitet 1957–1974.

Hyka kreu studimet e larta në Institutin e Kulturës Fizike dhe Sporteve, duke i përfunduar në vitin 1968. Nga viti 1967–1974, ka qenë anëtar i ekipit Shpresa dhe atij Kombëtar në të gjitha aktivitetet e zhvilluara.

Skënder Hyka, ishte një prej futbollistëve më të shquar të viteve 60’-70’, i cili ka spikatur me talentin dhe aftësinë e tij, duke u bërë i dashur për tifozët anë e mbanë Shqipërisë. Pasi la futbollin e luajtur ai gjithashtu spikati edhe si drejtues i FSHF në rolin e Sekretarit të Përgjithshëm apo për disa mandate radhazi si anëtar i Komitetit Ekzekutiv.

Në këtë dokumentar shokët dhe miqtë e tij risjellin kujtimet dhe emocionet personale të përjetuara me Hykën brenda dhe jashtë fushave përmes rrëfimeve të tyre për një nga personazhet më të dashur për tifozerinë bardheblu dhe kryeqytetin.