Basketbollistet e Spanjës u kualifikuan në finalen e Eurobasketit pasi mposhtën mbrëmjen e djeshme në Berlin në gjysmëfinalen e dytë ekipin vendas të Gjermanisë me rezultat 96:91.

Skuadrat ishin të kujdesshme në fillim të ndeshjes dhe asnjëra nuk pati një avantazh të dukshëm. Vetëm në fund të çerekut të parë spanjollët kryesuan me gjashtë pikë.

Spanja pati një avantazh prej nëntë pikësh për një kohë të gjatë në çerekun e dytë dhe më pas pasoi një ecuri fenomenale e Gjermanisë, e cila përmbysi rezultatin dhe kaloi në epërsi 51:46.

Në mesin e periodës së tretë, Spanja rikthehet sërish në këtë ndeshje jashtëzakonisht interesante, por Gjermania shton gazin dhe para çerekut të fundit kishte një avantazh prej gjashtë pikësh.

Megjithatë, në çerekun e fundit ndodhi një tjetër përmbysje spektakolare, këtë herë nga spanjollët. Gjermanët u bllokuan plotësisht, ndaj mikpritësve të turneut iu desh të zgjasin duart dhe të uronin spanjollët e mëdhenj për fitoren.

Më i miri për spanjollët ishte Lorenzo D'ontez Brown me 29 pikë dhe gjashtë asistime, ndërsa Willy Hernangomez shënoi 16 pikë. Dennis Schroder ishte më i miri për Gjermaninë me 30 pikë dhe tetë asistime.

Në finalen e Eurobasketit, Spanja do të luajë kundër Francës, e cila mposhti Poloninë në gjysmëfinalen e parë. Finalja do të luhet të dielën në Berlin me fillim nga ora 20:30.