Aktivizimi për tre ndeshje radhazi me përfaqësuesen shqiptare mendohej se do të ndihmonte Marash Kumbullën për të fituar pikë para syve të Zhoze Murinjos. Por tekniku i Romës, vazhdon të mos e marrë në konsideratë si zgjedhje të parë në prapavijë mbrojtësin shqiptar.

Sot, Kumbulla ishte planifikuar që të ulej në stolin e rezervave në ndeshjen kundër Sasuolos, për t’u aktivizuar ndoshta në pjesën e dytë të sfidës. Për çudinë e të gjithëve, ai nuk figuronte as në pankinë në këtë duel, për probleme shëndetësore dhe jo zgjedhje teknike.

Mediat italiane raportojnë se një gastroenterit ka ndaluar futbollistin që të japë kontributin e tij në fushën e lojës për këtë ndeshje. Kështu, lojtari është lënë pushim që të rikuperohet nga ky problem shëndetësor, e të jetë gati për duelin e të enjtes në Ligën e Konferencës ku mund të ketë minuta për të treguar vlerat e tij.