Dhjetëra banorë të Porto Romanos në Durrës protestuan duke kundërshtuar ndërtimin e rrugës së re që të çon drejt portit, nën pretendimin se nuk janë dëmshpërblyer për marrjen e pronës. Banorët thanë se rruga ka pasur gjurmë tjetër, ku është bërë dhe shpronësimi i tokës, por tashmë ka devijuar projekti.
Nga SYRI TV
Banorë të Porto Romanos në Durrës protestuan këtë të enjte duke kundërshtuar punimet e ndërtimit të rrugës së re, që të çon drejt portit.
Dhjetëra banorë të kësaj zone, pretendojnë se po u merret prona për ndërtimin e rrugës, pa u dëmshpërblyer. Sipas banorëve, për ndërtimin e rrugës është shpronësuar një pjesë toke disa metra larg gjurmës ku po punohet aktualisht.
Banoret thanë se tokat i kanë ata në pronësi me dokumente të rregullta, ndërsa veprimin e firmës kontraktore që po ndërton rrugën e cilësojnë si grabitje.
Për disa minuta, banorët bllokuan punën e makinerive të rënda që po ndërtojnë rrugën, por më pas janë larguar me ndërhyrjen e forcave të policisë.
© SYRI.net