Një suplement popullor për dhimbjet e kyçeve mund të përshpejtojë demencën

Një studim i ri ka gjetur një lidhje mes përdorimit të glukozaminës, një suplement i zakonshëm pa recetë për dhimbjet e kyçeve, dhe një rreziku më të lartë që personat me dëmtim të lehtë njohës të kalojnë në sëmundjen e Alzheimerit. Hulumtimi u krye nga neuroshkencëtarë të Universityof Florida dhe u publikua në revistën Nature Metabolism.

Studiuesit analizuan të dhënat mjekësore të viteve 2012–2024 për pacientë me Alzheimer, forma të tjera të demencës dhe dëmtim të lehtë njohës. Ata zbuluan se rreth 8% e pacientëve përdornin glukozaminë. Pas marrjes parasysh të faktorëve si mosha dhe gjinia, analiza tregoi se përdorimi i suplementit lidhej me një rritje prej 25% të gjasave që dëmtimi i lehtë njohës të përparonte në demencë.

Për më tepër, te pacientët që tashmë vuanin nga demenca, përdorimi i glukozaminës u shoqërua me një rritje prej 25% të rrezikut të vdekjes brenda një periudhe të caktuar kohore. Një efekt i tillë nuk u vu re te personat që kishin vetëm dëmtim të lehtë njohës.

Sipas autorit kryesor të studimit, RamonSun, gjetjet sugjerojnë se çrregullimet metabolike mund të luajnë një rol të rëndësishëm në përparimin e Alzheimerit. Studiuesit identifikuan një proces biologjik që shton struktura sheqeri mbi proteinat dhe që duket se është tepër aktiv në trurin e personave me Alzheimer.

Eksperimentet te minjtë e modifikuar gjenetikisht treguan se glukozamina rriti këtë proces dhe përkeqësoi kujtesën. Kur studiuesit e bllokuan atë kimikisht, funksionet e kujtesës u përmirësuan. Analiza e mostrave të trurit të njerëzve me Alzheimer konfirmoi gjithashtu nivele më të larta të këtij aktiviteti.

Megjithëse studimi tregon vetëm një lidhje dhe jo një marrëdhënie të drejtpërdrejtë shkak-pasojë, autorët theksojnë se rezultatet ngrenë pyetje të rëndësishme mbi sigurinë e glukozaminës te personat me Alzheimer ose rrezik të lartë për demencë. Ata kërkojnë studime klinike te njerëzit për të vërtetuar këto gjetje.