Studiuesit kanë identifikuar ndryshime në strukturën e nyjeve limfatike, të cilat mund të ndihmojnë në identifikimin e njerëzve që janë në rrezik më të lartë ose më të ulët për përhapjen e kancerit të gjirit.

Një studim zbuloi se struktura e një rrjeti që mbështet nyjet limfatike mund të ndryshojë për shkak të sëmundjes, edhe para se mjekët të jenë në gjendje të dallojnë ndonjë qelizë kancerogjene atje.

Disa ndryshime ishin të lidhura me një shans më të mirë për mbijetesë, ndërsa të tjera çuan në një prognozë më të keqe për pacientin.

Studiuesit thanë se gjetjet mund të udhëheqin vendimet për trajtimin, dhe të ndihmojnë më shumë njerëz të shmangin trajtimin e panevojshëm.

Nyjet limfatike luajnë një rol kyç në sistemin imunitar, duke ndihmuar trupin të luftojë infeksionet dhe kancerin.

Në kancerin e gjirit, nyjet limfatike në sqetull janë shpesh vendi i parë ku përhapet sëmundja dhe, për momentin, të gjithë me kancer invaziv të gjirit i nënshtrohen një ndërhyrjeje kirurgjikale për të hequr nyjet limfatike për të kontrolluar qelizat kancerogjene.

Ndërsa kjo është efektive, mund të çojë në efekte anësore afatgjata, si ënjtje e krahut (limfoedemë) dhe mund të jetë e panevojshme për disa pacientë.

Hulumtimi i ri, i financuar nga organizata bamirëse Breast Cancer Now, mund të ndihmojë në identifikimin e njerëzve që janë në rrezik më të lartë ose më të ulët të përhapjes së kancerit të gjirit.

“Këto gjetje sugjerojnë që ndryshimet në strukturën e nyjeve limfatike, janë më shumë sesa thjesht një pasojë e kancerit. Ato gjithashtu mund të luajnë një rol aktiv në ndihmën për përparimin e kancerit të gjirit”, tha Dr. Simon Vincent, drejtor shkencor në organizatën bamirëse britanike Breast Cancer Now:

“Me një person që vdes tragjikisht nga kanceri i gjirit çdo 45 minuta në Mbretërinë e Bashkuar, ne kemi nevojë urgjente për kërkime të tilla në mënyrë që të kuptojmë më mirë se kush është më në rrezik që kanceri i tij të përparojë dhe të bëhet i pashërueshëm. Vetëm atëherë mund të gjejmë mënyra për ta ndaluar atë”, tha Vincent.

"Me një kuptim më të mirë të mënyrës se si ndryshojnë nyjet limfatike ndërsa përhapet kanceri i gjirit, ne mund të gjejmë objektiva të reja për trajtimet e ardhshme për llojet e kancerit të gjirit që janë më të vështira për t'u trajtuar."

Dr. Amy Llewellyn dhe Dr. Kalnisha Naidoo nga King's College London, së bashku me profesoreshën Sophie Acton në University College London, studiuan 331 mostra të nyjeve limfatike të marra nga njerëz me lloje të ndryshme të kancerit të gjirit dhe i krahasuan ato me nyjet limfatike të shëndetshme tek njerëzit pa sëmundje.

Ata studiuan një grup unik qelizash brenda nyjeve limfatike të quajtura qeliza retikulare fibroblastike (FRC).

Rrjeti FRC siguron strukturën për nyjen limfatike, kontrollon rrjedhën e lëngjeve dhe aktivizon qeliza të ndryshme imune.

Ekipi zbuloi se struktura e këtij rrjeti FRC mund të ndryshojë edhe para se kanceri i gjirit të përhapet dhe ndryshimet ishin të ndryshme në varësi të llojit të kancerit të gjirit, çdo përhapjeje dhe nëse dikush kishte marrë kimioterapi.

Në të ardhmen, këto gjetje mund të mbështesin trajtime të reja, kujdes më të përshtatur dhe të sigurojnë që më shumë njerëz të shmangin efektet anësore të panevojshme.

Dr. Llewellyn tha: “Deri më tani nuk e kemi kuptuar plotësisht se si dhe kur nyjet limfatike ndryshohen në një mënyrë që lejon përhapjen e kancerit.”

"Si rezultat, çdo paciente me kancer të gjirit aktualisht duhet t'i hiqen disa nga nyjet limfatike për përcaktimin e saktë të stadifikimit dhe planifikimin e trajtimit."

"Ndërsa kjo është efektive, mund të çojë në ndërlikime afatgjata dhe mund të jetë e panevojshme për disa pacientë, veçanërisht ata me sëmundje në fazë të hershme ose ata kanceri i të cilëve i përgjigjet mirë trajtimit."

"Prandaj, ekziston një nevojë urgjente për të kuptuar më mirë biologjinë e zinxhirit të nyjeve limfatike dhe studimi ynë e adreson këtë boshllëk, duke ofruar analizën e parë në shkallë të gjerë të FRC në indet e nyjeve limfatike njerëzore nga pacientët me kancer të gjirit."

Ruth Smith, 59 vjeç, nga Buckinghamshire në Angli, u diagnostikua me kancer të gjirit trefish negativ në janar 2023, pasi zbuloi një gungë në gjoksin e saj të djathtë.

“Të kaloja nëpër trajtimin e kancerit të gjirit dhe të më thoshin se duheshin hequr nyjet limfatike ishte e frikshme, dhe në atë kohë unë u përqendrova vetëm të bëja çdo gjë që ishte e nevojshme për të trajtuar kancerin”, tha ajo.

“Ënjtja dhe shqetësimi mund të kenë një ndikim të vërtetë në jetën e përditshme dhe është diçka që tani duhet ta menaxhoj në planin afatgjatë”, tha ajo.

"Një hulumtim i tillë është shumë i rëndësishëm sepse mund t'i ndihmojë mjekët të kuptojnë më mirë se kush ka nevojë për cilat trajtime dhe, shpresojmë, të zvogëlojë numrin e njerëzve që zhvillojnë limfedemë në të ardhmen."/ DPA News.