Ilaçi për artritin mund të ndihmojë pacientët me depresion të vështirë për t’u trajtuar

Një ilaç i përdorur për artritin reumatoid, mund të jetë një mundësi e re premtuese trajtimi për pacientët me depresion të vështirë për t’u trajtuar, sipas një studimi.

Studiuesit hetuan për herë të parë nëse tocilizumab, një ilaç ekzistues anti-inflamator, mund të përmirësonte simptomat e depresionit tek njerëzit që nuk i janë përgjigjur trajtimeve standarde me antidepresivë.

Në studimin morën pjesë 30 persona me depresion të moderuar deri të rëndë, dhe ky studim ofron prova të hershme se tocilizumab mund të zvogëlojë simptomat e depresionit, lodhjen, ankthin dhe të rrisë cilësinë e përgjithshme të jetës.

Trajtimet aktuale me ilaçe për depresionin, bazohen vetëm në shënjestrimin e kimikateve në tru, të tilla si serotonina, norepinefrina dhe dopamina.

Rreth një në tre persona me depresion nuk përmirësohen me këto trajtime.

Hulumtimet e fundit tregojnë se rreth një e treta e njerëzve me depresion kanë shenja inflamacioni në gjakun e tyre, duke treguar se simptomat e tyre mund të lidhen me një sistem imunitar tepër aktiv.

Studime të tjera tregojnë nivele më të larta të proteinave inflamatore të quajtura citokina në depresion, duke përfshirë interleukinën 6 (IL-6).

Studiuesit në Universitetin e Bristolit donin të shihnin nëse simptomat mund të përmirësoheshin tek njerëzit me depresion të lidhur me inflamacionin, duke bllokuar rrugën IL-6.

Studimi i ndau pjesëmarrësit në dy pjesë, gjysmës prej të cilëve iu dha tocilizumab dhe pjesës tjetër placebo.

Gjetjet sugjerojnë se pjesëmarrësit që morën tocilizumab duket se përjetuan përmirësime më të mëdha me kalimin e kohës, krahasuar me ata që morën një placebo.

"Ky punim përfaqëson një moment të rëndësishëm në zhvillimin e trajtimeve të reja për depresionin, veçanërisht depresionin e vështirë për t'u trajtuar", tha autori kryesor, Profesor Golam Khandakar, nga Universiteti i Bristolit.

"Ky është një nga studimet e para të kontrolluara të rastësishme për të testuar imunoterapinë për depresionin, i pari që teston IL-6R si objektiv trajtimi, dhe i pari që përdor një qasje të synuar për të zgjedhur pacientët që ka më shumë gjasa të përfitojnë dhe për të treguar se funksionon."

Autori kryesor, Dr. Eimear Foley, shtoi: “Depresioni vlerësohet se prek rreth 10% deri në 20% të njerëzve në mbarë botën gjatë jetës së tyre, megjithatë për shumë pacientë trajtimet aktuale nuk funksionojnë mjaftueshëm mirë.”

“Studimi ynë na afron më shumë me një kujdes më të përshtatur për depresionin, ku trajtimet zgjidhen për t'iu përshtatur më mirë biologjisë së një personi.”

“Kjo do të na ndihmojë të ofrojmë trajtimin e duhur për pacientët e duhur, në kohën e duhur.”

Hapi tjetër do të jetë kryerja e një studimi të kontrolluar të rastësishëm të fazës III në shkallë të gjerë, që do të ofrojë prova përfundimtare për t'u mundësuar mjekëve të përshkruajnë imunoterapi për depresionin.

Studimi, me titull “Interleukina 6 si objektiv trajtimi për depresionin: një provë klinike e rastësishme e konceptit”, është botuar në revistën JAMA Psychiatry./ DPA News.