Në mbarë Turqinë u mbyllën qendrat e votimit për zgjedhjet për pushtetin lokal, raporton Anadolu.

Votimi filloi në orën 7:00 të mëngjesit me kohën lokale dhe vazhdoi deri në orën 16:00 me kohën lokale në 32 provinca lindore të vendit, kurse në provincat e mbetura, qendrat e votimit u hapën në orën 08:00 dhe u mbyllën në orën 17:00.

Pjesëmarrja ka qenë shumë e lartë, prej më shumë se 61 milionë votuesish.

Në garë ishin kandidatë nga 34 parti politike, ndërsa në mbarë vendin janë vendosur më shumë se 206.000 qendra votimi.

Krahas krerëve të 81 provincave, qytetarët hodhën votën e tyre për 973 kryetarë të rretheve dhe 390 kryetarë bashkie së bashku me 50.336 muhtarë, si dhe anëtarët e asambleve të përgjithshme provinciale dhe të këshillave bashkiakë.

Votuesit që jetojnë në qytetet më të mëdha të Türkiyes votuan për kryetarë bashkie metropolitane, kryetar bashkie, anëtarësi në këshillat bashkiakë, si dhe për muhtarët dhe këshillat e pleqve. Ato qytete janë Adana, Ankara, Antalya, Aydın, Balıkesir, Bursa, Denizli, Diyarbakır, Erzurum, Eskişehir, Gaziantep, Hatay, Istanbul, Izmir, Kahramanmaraş, Kayseri, Kocaeli, Konya, Malatya, Manisa, Mardin, Mersin, Muğla, Ordu, Sakarya, Samsun, Şanlıurfa, Tekirdağ, Trabzon dhe Van.

Në provincat e tjera, votuesit hodhën votat e tyre për anëtarët në këshillat provincialë, kryetarët e bashkive, anëtarët në këshillat bashkiakë, muhtarët dhe këshillat e pleqve. Në fshatra u votua për anëtarët në këshillat provincialë, muhtarët dhe këshillat e pleqve.

Partitë politike

Partitë kryesore garuese ishin Partia për Drejtësi dhe Zhvillim (AK), opozita kryesore Partia Popullore Republikane (CHP), Partia e Lëvizjes Nacionaliste (MHP), Partia IYI dhe Partia Demokratike Popullore (DEM).

Parti të tjera politike ishin Partia e Majtë, Partia e Unitetit të Madh, Partia e Atdheut, Partia e Mëmëdheut, Partia e Majtë Demokratike, Partia e Mirëqenies, Partia Komuniste e Türkiyes, Partia e Bashkimit të Anadollit, Partia e Fitores, Partia për Çlirimin e Popullit, Lëvizja Komuniste e Türkiyes, Partia e Pavarur e Türkiyes, Partia e së Ardhmes, Partia e Türkiyes së Re, Partia e Punës, Partia e Kauzës së Lirë, Partia e të Drejtave dhe Lirive, Partia Ocak, Partia e Bashkimit të Drejtësisë, Partia Demokratike, Partia e Bashkimit të Fuqisë, Partia e Rrugës Kombëtare, Partia e Drejtësisë, Partia e Demokracisë së Ndritshme, Partia e Punëtorëve të Türkiyes, Partia e Demokracisë dhe Përparimit, Partia e Lumturisë dhe Partia Atdheu./AG