Arrestimet e të dyshuarve për korrupsion në Parlamentin Evropian janë “shumë, shumë shqetësuese”. Kështu është shprehur shefi i politikës së jashtme të BE-së, Josep Borrell.

Dhe ministri irlandez i Punëve të Jashtme Simon Coveney tha se akuzat kundër katër personave ishin “shumë të dëmshme”.

Në mesin e të arrestuarve ishte edhe zëvendëspresidentja e Parlamentit Evropian, Eva Kaili.

Hetuesit dyshojnë se një prej shteteve të Gjirit, që raportohet të jetë Katari, është përpjekur që të influencojë parlamentin duke dhuruar para ose dhurata. Katari i ka mohuar akuzat.

Policia belge sekuestroi para me vlerë rreth 600,000 euro në 16 kontrolle në Bruksel të premten. Gjithashtu janë marrë kompjutera dhe telefona celularë për të ekzaminuar përmbajtjen e tyre.

Katër persona janë akuzuar ndërsa dy janë liruar, thanë prokurorët të dielën.

Asnjë i dyshuar nuk është përmendur publikisht, por zonja Kaili mësohet të jetë në mesin e atyre që janë paditur.

“Ata akuzohen për pjesëmarrje në një organizatë kriminale, pastrim parash dhe korrupsion”, tha në një deklaratë zyra e prokurorisë federale belge.

Zonja Kaili, u pezullua nga detyra e saj si një nga 14 nënkryetarët e Parlamentit Evropian.

Ajo është pezulluar gjithashtu nga Grupi i Socialistëve dhe Demokratëve në parlament dhe është përjashtuar nga partia e qendrës së majtë greke Pasok.

Prokurorët në Greqi thuhet se kanë ngrirë të gjitha pasuritë e zonjës Kaili.

Vëzhguesit dhe deputetët e opozitës thanë se hetimi për korrupsion mund të përfaqësojë një nga skandalet më të mëdha të korrupsionit në historinë e Parlamentit Evropian.

Michiel van Hulten, një ish-deputet dhe drejtor i organizatës kundër korrupsionit, Transparency International EU, tha: “Ndërsa ky mund të jetë rasti më i frikshëm i korrupsionit të dyshuar që Parlamenti Evropian ka parë në shumë vite, ai nuk është një incident i izoluar.

“Gjatë shumë dekadave, parlamenti ka lejuar të zhvillohet një kulturë e mosndëshkimit, me një kombinim të rregullave dhe kontrolleve të dobëta financiare dhe një mungesë të plotë të mbikëqyrjes së pavarur – ose në të vërtetë të ndonjë etike. Në shumë mënyra ai është bërë një ligj më vete. ”

Borrell, duke folur me gazetarët teksa mbërriti në një takim të ministrave të jashtëm të BE-së të hënën, tha: “Sigurisht që lajmet janë shumë, shumë shqetësuese.

“Ne po përballemi me disa ngjarje, disa fakte, që sigurisht që më shqetësojnë mua si ish-president i Parlamentit Evropian.