Kreu i PD, Sali Berisha, gjatë një bashkëbisedimi me qytetarët në rrjetet sociale, u shpreh se kryeministri Edi Rama është miliarder dhe se pasuria e tij fillestare në vitin 2014 kapte 200 milionë euro në banka offshore.

Berisha theksoi se kjo pasuri u ndërtua kryesisht përmes praktikave të dyshimta në ndërtim, duke inkasuar fitime nga kate shtesë pallatesh dhe projekte të tjera ndërtimi. Ai shtoi se, sipas të dhënave të Bankës Botërore dhe Kontrollit të Lartë të Shtetit, Rama dhe administrata e tij kanë shpërdoruar dhe përvetësuar një pjesë të konsiderueshme të buxheteve publike gjatë 12 viteve të qeverisjes.

Berisha lidh këtë me skandalin e ministres Lubi Balluku, duke theksuar se nëse ajo zotëron 300 apartamente, dy jahte dhe disa vila, Rama, sipas tij, ka pasuri të paktën pesë herë më të madhe dhe kontrollon resorte dhe prona luksoze në vend. Ai e konsideroi këtë javë si një “java e zbulimeve të mëdha të korrupsionit” dhe një moment ku Rama ka hequr çdo maskë përballë publikut.

Fjala e tij:

Disa herë kam deklaruar se Edi Rama është miliarder dhe unë e dija kur bëja këtë deklaratë se e kishit të vështirë ta besonit, por unë e kam bërë këtë deklaratë të bazuar në dokumente, fakte.
Çdo shqiptar mban mend se në vitin 2014, në një raport sekret të OSBE, u deklarua se Edi Rama ka në bankat offshore 200 milionë euro.
Edi Rama nuk e përgënjeshtroi kurrë dhe nuk paditi kurrë autorin e raportit.
Nuk padiste dot një organizatë se ajo do i nxirrte çdo qindarkë.
Por një moment.
Edi Rama, pra, u bë kryeministër me 200 milionë euro në kontot bankare offshore.
Si u bë?
U bë absolutisht vetëm nëpërmjet kateve të ndërtimit.
Në çdo pallat, Edi Rama gjobiste me 1 apo 2 kate në varësi nga lartësia e pallatit, dhe nuk pranonte apartamentin, por pranonte vetëm shumën me çmimin e shitjes të apartamentit.
Dhe kjo është e faktuar.
Janë biznesmenë guximtarë që ia kanë thënë në sy, janë të tjerë që e kanë deklaruar prore.
Pikërisht me pallatet, me katet e pallateve, Edi Rama u bë kryeministër me 200 milionë euro të fshehura.
Por nga viti 2014 gjer sot, në 10-12 vite, Edi Rama, mos harroni se këto kanë qenë vitet e ndërtimit të pallateve më të shumta, më të larta në tërë historinë tonë.
Këtu Edi Rama nuk është ndaluar me një kat apo dy, por këtu ai ka inkasuar shumat e të paktën 4-5 kateve. Minimumi.
Por tani menaxher i 67 miliardë euro, që është totali i buxheteve 12-vjeçare, Edi Rama me lukuninë e tij, sipas të dhënave të Bankës Botërore dhe Kontrollit të Lartë të Shtetit, ka shpërdorur dhe përvetësuar minimumi 90 përqind të tyre.
Kjo javë pra është java e zbulimit të madh.
E zbulimit të korrupsionit të përmasave të diktaturave afrikane të dikurshme.
Është java në të cilën Edi Rama hoqi çdo maskë para shqiptarëve dhe u vendos i tëri në mbrojtje të vjedhjeve të zbuluara me dokumente të Lubi Ballukut.
Të mbrojtjes të 300 apartamenteve të blerë me paratë e taksapaguesve shqiptarë.
Të mbrojtjes së jahteve të blera me paratë e taksapaguesve shqiptarë.
Dhe ai, urdhëroi në mënyrë më kriminale dje deputetët e tij të mos lejonin heqjen e imunitetit të Lubi Ballukut për faktin e vetëm se në qoftë se Lubia ka 300 apartamente, Edi Rama ka minimumi 1500.
Se në qoftë se Lubia ka 2 jahte, Rama ka minimumi 5, nëse i janë dashtë.
Se në qoftë se Lubia ka 2 vila, Rama është pronar në resorte të tëra turistike.
Çfarë kam parë unë në portin e Durrësit, dhe pikërisht në atë kohë kam deklaruar se Edi Rama do me kusht të bëhet miliarder si Alabari, dhe në portin e Durrësit ku ndërtohet 12 mijë apartamente, 12 hotele me 5 dhe 6 yje, me pishina dhe të gjitha lukset e tjera, ka për pronar të parë absolutisht Edi Ramën, klanet e drogës dhe pastaj Al Alabarin.
Pra, java ishte java e zbulimeve më të mëdha të zeza për Edi Ramën dhe qeverinë shqiptare.