Aksidenti në Tiranë-Durrës/ Trauma: 5 të plagosur lanë spitalin, 8-vjeçari në reanimacion

Spitali Universitar i Traumës ka përditësuar bilancin për të plagosurit nga aksidenti i rëndë në autostradën Tiranë–Durrës.

Sipas mjekëve, pesë pacientë janë larguar nga spitali jashtë rrezikut për jetën, ndërsa edhe një tjetër pritet të dalë gjatë ditës.

Ndërkohë, dy pacientë vijojnë të trajtohen në Reanimacion, mes tyre një 8-vjeçar me parametra jetësorë të qëndrueshëm dhe një 56-vjeçare shtetase çeke me origjinë vietnameze, e cila ndodhet në gjendje të rëndë, por të stabilizuar.

Njoftimi: 

Spitali Universitar i Traumës njofton se ekipi multidisiplinar i SUT ka qenë në gatishmëri dhe ka ndjekur në dinamikë pacientët e përfshirë në aksidentin e ndodhur në autostradën Tiranë–Durrës.

5 pacientë, të cilët ditën e djeshme janë paraqitur koshientë dhe më të stabilizuar, pas trajtimit mjekësor sipas protokolleve përkatëse, janë larguar nga spitali, jashtë rrezikut për jetën, me këshillë nga mjeku.

Gjithashtu, pritet që edhe një pacient tjetër të largohet nga spitali gjatë ditës, jashtë rrezikut për jetën dhe me këshillë nga mjeku.

I mituri 8-vjeçar ndodhet në Reanimacionin e SUT, me parametra jetësorë stabël.

Gjithashtu, në Reanimacion ndodhet edhe një shtetase vietnameze me nënshtetësi çeke, 56 vjeç, e cila është në monitorim intensiv. Ajo paraqitet me parametra jetësorë stabël, por në gjendje të rëndë shëndetësore për shkak të dëmtimeve të shumta të marra.

Fëmija 14-vjeçar ndodhet jashtë rrezikut për jetën, në pavion, nën kujdesin e stafit mjekësor, me dëmtime në gjymtyrët e poshtme.

Sa i përket pacientëve që ndodhen ende në observimin e Urgjencës dhe që i janë nënshtruar ndërhyrjeve kirurgjikale, gjendja e tyre shëndetësore është e stabilizuar dhe do të vijojnë të qëndrojnë në monitorim intensiv. Ndër ta është edhe një shtetase çeke me origjinë vietnameze, 20 vjeç.