Dy burra dhe një grua nga Bristoli, të akuzuar për komplot për të vrarë një biznesmenin lezhjan në hotelin e tij në Shqipëri, nuk mund të ekstradohen pas një seance dëgjimore në Gjykatën e Apelit.

Steven Hunt, 52 vjeç; Thomas Mithan, 37 vjeç; dhe 30-vjeçarja Harriet Bridgeman - të gjithë nga Bristoli - së bashku me Harry Simpson, 35 vjeç, nga Londra jugore, u akuzuan, së bashku me 40-vjeçarin britaniko-shqiptar Edmond Haxhia nga Birminghami, për organizimin e një vrasjeje ndaj biznesmenit Ardian Nikulaj në restorantin e tij, në Shqipëri në vitin 2023, raportojnë mediat britanike.

Prokurorët shqiptarë pretenduan se Hunt, Mithan, Bridgeman dhe Simpson ishin të përfshirë në vëzhgimin e lëvizjeve të viktimës në ditët para të shtënave, dhe në rastin e Simpson, në ditën e të shtënave, dhe se secili prej tyre luajti një rol në planifikimin dhe ekzekutimin e vrasjes.

Vrasja dyshohet se ishte pjesë e një gjakmarrjeje 25-vjeçare midis të afërmve të Haxhias dhe atyre të viktimës, e cila dyshohet se buroi nga një vrasje tjetër në vitin 1997. Të katër i mohojnë akuzat.

Duke zgjatur gati tre dekada, ajo ka çuar tashmë në shtatë vrasje dhe dyshohet se ka filluar në një grindje për para.

Bridgeman, Hunt, Mithan dhe Haxhia u arrestuan në Bristol dhe Birmingham në prill 2023 me urdhër-arreste ndërkombëtare nga Shqipëria në Mbretërinë e Bashkuar, pak ditë pas vrasjes.

Personi i armatosur, Ruben Saraiva, një banor britanik i lindur në Portugali, i cili u rrit në Reading, Berkshire, që nga mosha katër vjeç, u dënua me burgim të përjetshëm pa të drejtë lirimi me kusht.

Pamjet e kamerave të sigurisë të incidentit të prillit 2023, kapën momentin kur Saraiva, i veshur si shofer shpërndarës, e qëlloi me një pistoletë automatike të prodhimit sovjetik dhe më u largua.

Të pestë i mohuan akuzat kundër tyre dhe në gusht 2024, pas seancës së plotë dëgjimore për ekstradim, gjykatësi i rrethit Daniel Sternberg tha se Bridgeman, Mithan, Simpson dhe Haxhia duhet të dërgohen në Shqipëri.

Ai tha në gjykimin e tij: "Argumenti i Qeverisë së Shqipërisë është se Edmond Haxhia organizoi vrasjen e Ardian Nikulajt nga Reuben Saraiva më 19 prill 2023 dhe se personat e tjerë të kërkuar, Steven Hunt, Thomas Mithan, Harriet Bridgeman dhe Harry Simpson, ishin të përfshirë në vëzhgimin e lëvizjeve të viktimës në ditët para të shtënave, dhe në rastin e Simpson në ditën e vetë të shtënave, dhe se secili prej tyre luajti një rol në planifikimin dhe ekzekutimin e vrasjes."

Ai ia dërgoi çështjen Sekretarit të Brendshëm të atëhershëm për një vendim përfundimtar, i cili miratoi edhe ekstradimin.

Megjithatë, të pestë e kundërshtuan ekstradimin në një seancë dëgjimore në Gjykatën e Magjistraturës së Westminsterit në tetor të vitit të kaluar, pasi Ministria e Brendshme pranoi para zyrtarëve shqiptarë në gusht 2025, se kishte bërë një gabim potencialisht serioz që mund të ndikonte në procedurat.

Sipas një raporti të Daily Mail, kërkesa për ekstradim u ndryshua gjatë procedurave, kështu që certifikimi origjinal i Sekretarit të Brendshëm para seancës dëgjimore nuk ishte më i vlefshëm.

Urdhri i ekstradimit thoshte se të gjithë të dyshuarit ishin akuzuar në Shqipëri për posedim të paligjshëm të armëve të zjarrit dhe municionit, si dhe për vrasje. Megjithatë, në shtator 2023, autoritetet shqiptare i hoqën akuzat për armë zjarri, duke i zëvendësuar ato me akuzat për 'vrasje me paramendim'.

Gjykatësi, z. Justice Swift, tha se çështja e dërguar nga gjykatësi i rrethit te Sekretari i Shtetit, "bazohej në një kërkesë për ekstradim që nuk i ishte bërë Sekretarit të Shtetit".

Ai shtoi: "Duke i bashkuar këto çështje, del se kjo bazë apelimi është e suksesshme dhe bashkë me të, edhe apelimet e secilit Apelues janë të suksesshme. Nuk ishte e drejtë e gjyqtarit të rrethit t'i dërgonte Sekretarit të Shtetit një çështje për ekstradim që nuk ishte në asnjë pjesë kërkesë e certifikuar nga Sekretari i Shtetit sipas nenit 70 të Aktit të vitit 2003. "

Një zëdhënës i CPS tha: "Gjykata i pranoi apelet duke u bazuar në faktin se kërkesat e shqyrtuara nga gjykata e shkallës së parë, nuk ishin të vlefshme dhe rrëzoi urdhrat e ekstradimit.

"Në emër të Republikës së Shqipërisë, është dhënë njoftim për qëllimin për të kërkuar leje për të apeluar në Gjykatën e Lartë sipas nenit 114 të Ligjit të Ekstradimit të vitit 2003.

"Çdo kërkesë për leje për të apeluar do të bëhet në përputhje me afatet ligjore.

"Nuk do të ishte e përshtatshme të komentoja më tej, ndërsa procedurat janë duke vazhduar."