Shërbente si ndërmjetëse e mafies shqiptare, nën hetim avokatja e njohur italiane

Avokatja Daniela Paccoi dyshohet se ka shërbyer si ndërmjetëse me mafian shqiptare. Mes veprave penale të dyshuara është edhe “bashkëpunimi në një organizatë të strukturuar për trafik droge”.

RAI NEWS

Ajo shërbente si ndërmjetëse mes krerëve të organizatës dhe klientit të saj, i arrestuar në janar të vitit të kaluar me 65 kilogramë kokainë. Ajo përcillte edhe brenda burgut mesazhe që vinin nga Shqipëria dhe sigurohej që i arrestuari të mos zbulonte identitetin e bashkëpunëtorëve të tij, duke organizuar madje edhe një gjetje të rreme droge, e sjellë enkas nga ana tjetër e Adriatikut, për të simuluar gatishmërinë e tij për të bashkëpunuar me hetuesit.

Ky është roli organik brenda një organizate të rëndësishme kriminale ndërkombëtare që prokuroria e Perugia-s i atribuon një avokateje të njohur të qytetit, Daniela Paccoi, së cilës i është njoftuar përfundimi i hetimeve.

Akuzat ndaj penalistes janë: pjesëmarrje në organizatë të strukturuar për trafik droge, nxitje për të dhënë deklarata të rreme dhe bashkëpunim në trafik droge.

Nën hetim, në dosjen e koordinuar nga zëvendësprokurori i Perugia-s, Gennaro Iannarone, janë edhe dy persona të tjerë: një shqiptar, i konsideruar nga hetuesit si korrier dhe arkëtar në Itali i organizatës, si dhe Matteo Coresi.

Ky i fundit është vëllai i Gianpaolo Coresi-t, i mbrojtur nga avokatja Paccoi, i arrestuar në janar të një viti më parë me 65 kilogramë kokainë të fshehura në fundin e dyfishtë të makinës dhe brenda picerisë së tij në Foligno.

Nga frika se Coresi mund të bashkëpunonte me prokurorët pas arrestimit, hetuesit e Njësisë së Policisë Ekonomiko-Financiare GICO të Gardës së Financës në Perugia rindërtuan, përmes përgjimeve telefonike dhe ambientale, madje edhe brenda burgut të Capanne-s, se drejtuesit e organizatës në Shqipëri, përmes avokates – të cilës i paguanin rregullisht honoraret – i dërgonin para dhe mesazhe, duke i garantuar zgjidhje për të pasur një trajtim më të butë nga drejtësia.

Pikërisht për këtë qëllim, sipas dokumenteve, tre të hetuarit kishin organizuar transportin e dy kilogramëve drogë, të cilat më pas u fshehën në një pus kontrolli në një tokë në pronësi të familjes së të arrestuarit, në zonën Casenove të Folignos.

Ky vend fshehjeje, që Coresi – i cili më 7 maj do të paraqitet para gjykatësve për procesin me procedurë të shkurtuar – duke pretenduar se donte të bashkëpunonte me hetuesit, e kishte bërë më pas të zbulohej nga Garda e Financës, duke u dhënë edhe një hartë të detajuar të vendit.