SYRI TV/ Skandal në spitalin rajonal të Fierit, prej 2 muajsh pacientët nuk marrin trajtimin jetik me kimioterapi

Një skandal ka përfshirë Spitalin Rajonal të Fierit, ku prej më shumë se dy muajsh, pacientët me kancer nuk marrin trajtimin jetik me kimioterapi. Mungesa e medikamentit Gemcitabine ka lënë dhjetëra pacientë në mëshirë të fatit, ndërsa drejtuesit e spitalit nuk japin asnjë afat për zgjidhje. Denoncimi është bërë nga familjarët e pacientëve, ndërsa mungesa e medikamentit është pranuar nga spitali Fier.

SYRI TV

Në Spitalin Rajonal të Fierit, prej më shumë se dy muajsh nuk kryhet kimioterapia për pacientët me sëmundje tumorale. Shkaku është mungesa e medikamentit jetik Gemcitabine 1 gr, një fakt i konfirmuar jo vetëm nga pacientët dhe familjarët e tyre, por edhe nga vetë drejtoria e spitalit.

Astrit Hasani, aktor në qytetin e Fierit, ka denoncuar publikisht situatën e vëllait të tij, Enver Hasani, 76 vjeç, i cili prej dy vitesh vuan nga kanceri në pankreas. Ai thotë se për afro dy muaj, vëllai nuk ka marrë trajtimin e nevojshëm, dhe gjendja e tij shëndetësore është përkeqësuar ndjeshëm.

Ai thotë se deri tani i kanë blerë privatisht, ndërsa spitali prej dy muajsh nuk i jep medikamentin e nevojshëm për kimio. Ai ngre dyshime se mund të jetë krijuar një skemë korrupsioni për të blerë medikamentin në spitale.

Burime brenda spitalit pohojnë se mungesa e medikamentit lidhet me dyfishimin e numrit të pacientëve, një situatë që nuk është parashikuar në planifikimin e furnizimeve.

I kontaktuar nga Syri TV, drejtori Arben Voja konfirmon mungesën e medikamentit dhe thotë se është bërë kërkesa për furnizim, por nuk jep asnjë afat për zgjidhjen e problemit.

Mungesa e medikamenteve bazë po rrezikon jetën e pacientëve me kancer, duke shënuar një tjetër skandal në sistemin shëndetësor nën drejtimin e qeverisë Rama.