Policia e Lezhës ka finalizuar hetimet dhe ka referuar në Prokurori materialet për dy shtetas të dyshuar për zjarrvënie në fshatrat Kakarriq dhe Velë.

Si pasojë e zjarreve të shkaktuara, është djegur një sipërfaqe e konsiderueshme bimësie, duke rrezikuar banorët dhe mjedisin.

Policia vijon punën për parandalimin e veprimeve të tilla të rrezikshme, ndërsa bëhet apel për qytetarët që të tregojnë kujdes dhe të raportojnë çdo situatë të dyshimtë.

Njoftimi i Policisë Lezhë:

Në vijim të punës për identifikimin dhe nxjerrjen përpara përgjegjësisë penale, të autorëve të zjarrvënieve, shërbimet e komisariateve të Policisë Lezhë dhe Mirditë referuan materialet në Prokurori, ku nisi procedimi penal për shtetasit:

-P. Gj., 61 vjeç, banues në fshatin Kakarriq, Lezhë, pasi si pasojë e përhapjes së zjarrit që dyshohet se ka ndezur në fshatin ku banonte, është djegur bimësi;

-A. D., 61 vjeç, banues në fshatin Rrajë e Velës, Mirditë, pasi si pasojë e përhapjes së zjarrit që dyshohet se ka ndezur në fshatin Velë, është djegur bimësi.

Materialet procedurale iu referuan Prokurorisë së Lezhës për veprime të mëtejshme.