SYRI TV/ SkyECC zbulon ‘hallet’ e trafikantëve - Flasin për groposjen e lekëve dhe konvertimin në flori

Bisedat e transkriptuara nga aplikacioni Sky ECC, kanë zbuluar “hallin” që kishin anëtarët e grupit kriminal të trafikut të kokainës nga Amerika Latine drejt Europës. Krerët e organizatës kriminale, Ervis Çela e Franc Çopja, në bisedat mes tyre shpesh herë diskutonin se si të gjenin një mënyrë për të fshehur apo pastruar paratë. Në një prej bisedave, ata flisnin për hapjen e gropave të ullinjve për të fshehur paratë, ndërsa në një tjetër bisedë, ku përfshiheshin edhe anëtarë të tjerë të grupit, flisnin për konvertimin e tyre në flori

Syri TV

Tonelatat e kokainës që vinin nga Amerika Latine drejt Europës, siguronin miliona euro për organizatën kriminale shqiptare të drejtuar nga Ervis Çela e Franc Çopja. Bisedat e kriptuara nga aplikacioni Sky ecc, zbardhin hallin që kishte gjetur anëtarët e grupit për të fshehur apo pastruar paratë. Shumat vinin në Shqipëri, ku pritësi kryesor dhe që kujdesej për to ishte Ervis Çela. Në një komunikim të Dhjetorit 2020 Ervis Çelës i thoshte Franc Çopjas, se eurot do të groposeshin në Shqipëri poshtë rrënjëve të ullinjve. Çopja e këshillonte t’i investonte në lingota ari pasi nën tokë paratë do të shkatërrohen.

Ervis Çela: Kam 200 ullinj në mal duhet fut naj qyp atyre. Se ullinjtë rrojnë shumë.

Franc Çopja: Aahaha...kthej flori. Mos fut lek në tokë. Më dëgjo mu...

Ervis Çela: S’ka flori...Duhet me grabit naj bank..Duhet me porosit nga Afrika...

Franc Çopja: E di që ska..Do flas un ktu me njanin mos na i sajo ky...Po mblidhi avash avash...Por mos fut lek n tok... Se t prishen.

Ervis Çela: E di që prishen lekët.

Një tjetër transkript është përftuar nga biseda mes Albin Çelës dhe vëllait të tij Ervis Çelës në aplikacionin Sky ECC, duke i thënë:

Ervis Çela: Hë sa fute?

Albin Çela: 4 cop...6 milion..I futa atje ke magazinat. Do i hedh beton përsipër...Po kam frikë knej për baçe se marrin lagështi...Mos u mërzit se i rregulloj unë...Do blej 500 kile flori...Nuk mahen lekët në gropë gjithë jetën.

Ervis Çela: I bone 60 milionë?

Albin Çela: Jo nuk i kam bo.

Ervis Çela: Ok se do i bosh...Të rregullosh kalamojt’....

Në këtë bisedë, vëllezërit Çela flasin për hapjen e gropave në rrënjët e ullirit për të fshehur eurot e kokainës. Në datë 13 Dhjetor 2020, Ervis Çela komunikon me vëllain e tij Ardjan Çela me të cilin dyshohet se bisedojnë në lidhje me fshehjen e parave cash dhe sasinë e parave të akumuluara prej tyre.

Ervis Çela: Marove tu bo gropa?

Ardjan Çela: Tani po mbaroj duke i përgatit..filloj dhe shiu tani...

Ervis Çela: Do ja kalosh lales?

Ardjan Çela: Po të mbaroj fuçin dhe të shkoj ti mbyll...Ahahaha...

Ervis Çela: Ahahaha...i bone 10?

Ardjan Çela: Lala ka më shumë...Po

Ervis Çela: Të nis dhe 4/5M ktë javë që vjen...Ahahaha...

Ardjan Çela: Flasim më vonë...

Më datë 14.12.2020, Ervis Çela komunikon me vëllain e tij Riza Çela të cilit i shkruan se ka akumuluar një vlerë monetare prej më shumë se 100 milionë euro. Më datë 2 Shkurt 2021 në orën 21:03, Ervis Çela komunikon me Franc Gergely (Çopja) të cilit i shkruan:

Ervis Çela: “Nuk dijm ku me çu lekët”.

Ervis Çela i përgjigjet:

Ervis Çela: Flori shok...Do t jap un kontakt..Do ti kthej të gjitha shqipri.

Franc Çopja: 20/30 kile çdo dit..Bani 1000 kile flori...

Ervis Çela: Po merr nja 200/300 kile për mu.

Franc Çopja: Ësht me 55 tani..Un vet kam arrit ke 100 kile deri tani...

GJKKO ka konfirmuar masën “arrest në burg” për 7 persona nga 15 masa sigurie, ndërsa ndryshoi masën nga arrest në burg në arrest shtëpie për Riza Çelën. Ndërkohë në “detyrim paraqitje” u lanë dy shoferët e autobusëve, Kujtim Gjyla dhe Ditjon Pepa cilët sillnin paratë në Shqipëri. I arrestuar më herët në Belgjikë është Franc Çopja. Organizta kriminale sipas SPAK arriti që të trafikojë 28 ton kokainë, 17 prej të cilave ju kapën.