​Zjarri masiv në Poliçan, flakët përfshijnë edhe fshatin Harunas, gjashtë të plagosur në spital

Zjarri masiv në Bashkinë Poliçan, Njësia Administrative Terpan, ka dalë plotësisht jashtë kontrollit, duke marrë përmasa të jashtëzakonshme dhe duke rrezikuar djegien e fshatrave përreth.

Autoritetet kanë urdhëruar evakuimin e menjëhershëm të banorëve në fshatrat Vokopolë, Zhapokikë, Plashnik dhe Panarit, si dhe në zonat brenda Rezervatit të Mbrojtur “Balloll”. Banorët janë thirrur të largohen pa vonesë nga banesat e tyre dhe të bashkëpunojnë me ekipet e emergjencës për një evakuim të sigurt.

Aktualisht, flakët kanë përfshirë edhe fshatin Harunas, ku hyrja është bërë e pamundur për shkak të bllokimit të rrugës kryesore nga zjarri. Kjo situatë ka izoluar disa zona të tjera malore, duke vështirësuar ndërhyrjen e forcave zjarrfikëse.

Deri tani, gjashtë persona janë raportuar të plagosur dhe ndodhen në spital, ndërsa forcat e emergjencës dhe banorët po luftojnë me kohën për të shpëtuar jetët dhe pronat nga përhapja e mëtejshme e flakëve.