Ish-shefja e kabinetit të ish-ministrit Arben Ahmetaj do të qëndrojë në burg. Apeli me Juridiksion të Përgjithshëm rrëzoi kërkesën e Alda Klosit për masë më të butë, pavarësisht 3 argumenteve të së pandehurës. Avokati i Klosit deklaroi se qëndrimi në burg i ish-zyrtares është i padrejtë, teksa sqaroi përplasjen e deklarimeve të saj me të vëllanë mbi origjinën e parave.
Nga SYRI TV
Gjykata e Apelit të Juridiksionit të Përgjithshëm e ka rrëzuar kërkesën e Alda Klosit, ish-shefe e kabinetit të Arben Ahmetajt kur ky i fundit ishte ministër i Financave dhe zv.kryeministër.
Klosi kundërshtoi arrestin me burg nga Gjykata e Shkallës së Parë, për deklarim të rremë para oficerit të Policisë Gjyqësore, pastrim parash dhe fshehje të pasurisë. Për këto dy të fundit, avokati i Klosit, Ilirjan Muho, tha se nuk qëndrojnë.
Më tej avokati, sqaroi përplasjen e deklarimeve të Alda Klosit me të vëllanë, mbi origjinën e 120 mijë eurove dhe 30 mijë dollarëve në banesën e sanitares Rozeta Dobi. Klosi kishte pohuar se i ishin lënë në ruajtje nga familja e xhaxhait, ndërsa i vëllai, pretendoi se i kishte marrë hua nga një i njohur.
Muho tha se apartamenti dhe garazhi i sekuestruar pas arrestimit, nuk janë të Klosit, por të ish-bashkëshortit. Ai këmbëngul që sanitarja është person i pabesueshëm si dhe për faktin se banesa është vjedhur duke përjashtuar versionin e inskenimit.
Alda Klosi, vijon të jetë mohuese se nuk është poseduese e 500 mijë eurove të tjera të gjetura në tubin e aspirimit në banesën e Rozeta e Havier Dobit, pavarësisht se këta të fundit janë deklaruar se paratë janë marrë nga i njëjti person.
Klosi paraqiti si argument për masë më të butë sigurie, gjendjen e saj shëndetësore, dy fëmijët e mitur si dhe të ëmën e sëmurë.
Gazetar: F. Gjinaj
Operator: M. Dervishi
Montazhier: T. Foto
© SYRI.net