Remize Lezi, mësimdhënësja nga Suhareka që të premten me një vendim u largua nga puna në shkollën “Flamuri i Arbërit” sot ka provuar që përsëri të kthehet në punë duke e konsideruar vendimin për largimin e saj për shkak të shamisë si të padrejtë.

Këtë e ka konfirmuar vetë, mësuesja Remzie Lezi e cila ka thënë që për momentin gjendet brenda në shkollë e nuk po largohet, se përsëri është njoftuar nga drejtori duke i thënë “se nuk mundem të të lë këtu me këtë uniformë”.

Mësimdhënësja që me 2 shtator u largua nga puna me arsyetim për mbajtjen e uniformës fetare, momentalisht po vazhdon të qëndrojë brenda objektit shkollor, mirëpo i është kërkuar të largohet nga objekti.

“Ende në shkollë jam me kolegë, i thashë edhe drejtorit që nuk largohem nga shkolla pa polici ose pa vendim të DKA-së, ndryshe nuk largohem nga këtu”, ka thënë ajo

Kujtojmë se në vendimin për largimin e saj thuhej se duke u bazuar në udhëzimin administrativ të vitit 2016, i cili nuk lejon uniformën fetare në shkolla, mësueses Lezi nuk i lejohet të vazhdojë të mbajë mësimin.